Էրդողանի ուղերձը՝ Հայոց Ցեղասպանության 102-րդ տարելիցի կապակցությամբ

Այսօր՝ ապրիլի 24-ին, Թուրքիայի նախագահ Ռեջեփ Թայիփ Էրդողանը Հայոց ցեղասպանության 102-րդ տարելիցի կապակցությամբ ուղերձ է հղել Թուրքիայի հայ համայնքին, որը պատարագի ժամանակ ընթերցել է Պոլսո Հայոց պատրիարքի փոխանորդ Արամ արքեպիսկոպոս Աթեշյանը։

Ուղերձում մասնավորապես ասվում է. «Այս տարի նույնպես հիշում ենք Առաջին աշխարհամարտի ծանր պայմաններում զոհ գնացած Օսմանյան Կայսրությունում ապրող հայերին և ցավակցում նրանց սեունդներին։

Այս տարածաշրջանում ապրող երկու հին ժողովուրդներ հայերը և թուրքերը մեկ հազարամյակ ապրել են ուս-ուսի՝ կիսելով նույն պատմությունը և մշակույթը»։

Էրդողանի խոսքով՝ ինչպես անցյալում, այնպես էլ այժմ հայերը մեծ դերակատարություն ունեն Թուրքիայի հասարակական և քաղաքական կյանքում։

«Բոլորիս ընդհանուր նպատակն է, որ դարերով միմյանց ուրախությունը և տխրությունը կիսած երկու ժողովուրդները բուժեն անցյալի վերքերը և ավելի ամրապնդեն մարդասիրական կապերը։ Վերջին 14 տարվա ընթացքում այս ուղղությամբ մի շարք քայլեր են կատարվել և կյանքի են կոչվել պատմական կարևորության բարեփոխումներ»։

Թուրքիայի նախագահը նշել է նաև, որ Թուրքիայի հայ համայնքի բարեկեցությունն ու անվտանգությունը չափազանց կարևոր է իր համար. «Թույլ չենք տա, որ մեր երկրում ապրող թեկուզ մեկ հայ իրեն օտար զգա», - ասել է Էրդողանը։

Այսպիսով, կարելի է արձանագրել, որ Էրդողանը շարունակում է առաջ տանել «ընդհանուր ցավի գաղափարը»՝ Հայոց Ցեղասպանությունը ներկայացնելով որպես Առաջին համաշխարհային պատերազմի ժամանակ տեղի ունեցած ողբերգական իրադարձություններ, որտեղ հավասարապես տուժել է նաև թուրք ժողովուրդը։