Թուրքիան կվերանայի ԵՄ անդամակցության վերաբերյալ իր դիրքոոշումը. Էրդողան

Անկարան կարող է փոխել ԵՄ հնարավոր անդամակցության վերաբերյալ իր դիրքորոշումը, քանի որ Բրյուսելը երկարաձգում է բանակցություններն այս հարցի շուրջ, իսկ եվրոպական որոշ երկրներ թշնամաբար են վերաբերվում Թուրքիային։ Այս մասին «Ռոյթերս» լրատվականին տված հարցազրույցում հայտարարել է Թուրքիայի նախագահ Ռեջեփ Թայիփ Էրդողանը։

«Եթե նրանք անկեղծ չեն գործում, ապա մենք պետք է այլ ճանապարհ գտնենք։ Ինչու՞ պետք է ձգտենք դրան։ Մենք բանակցություններ ենք վարում արդեն 54 տարի», - հայտարարել է Էրդողանն՝ ավելացնելով, որ Թուրքիայի ԵՄ անդամակցության հարցը կարող է դրվել համազգային հանրաքվեի։

«Մեծ Բրիտանիան հարցրեց իր ժողովրդին, և ժողովուրդը քվեարկեց Եվրամիությունից դուրս գալու օգտին։ Այժմ նրանք վստահորեն շարժվում են դեպի նոր ապագա։ Նույնը եղել է Նորվեգիայում, նույնը կարող է լինել նաև Թուրքիայում», - նշել է Էրդողանն՝ ընդգծելով, որ «Եվրամիությունը ոչնչացման եզրին է»։

Թուրքիայի նախագահի խոսքով՝ մեկ կամ երկու պետություններ չեն կարող ապահովել ԵՄ-ի կենսագործունեությունը։ «Այն (Եվրամիությունը) ուժեղ դարձնելու համար պետք է Թուրքիայի պես երկիր, որը ներկայացնում է այլ հավատ, դավանում է այլ կրոն։ Թվում է, սակայն, որ ԵՄ-ում այսքանը չեն հասկանում։ Նրանց համար շատ բարդ է որպես անդամ ընդունել մուսուլմանական պետության», - կարծում է Էրդողանը։

Հիշեցնենք, որ ապրիլի սկզբին Էրդողանը հայտարարել էր, որ Թուրքիան չի կարողանում անդամակցել ԵՄ-ին, քանի որ վերջինս քրիստոնեական միություն է։