ԱՄՆ Կենտրոնական հետախուզական վարչության պետն այցելել է Հարավային Կորեա

ԱՄՆ Կենտրոնական հետախուզական վարչության (ԿՀՎ) պետ Մայքլ Պոմպեոն ոչ պաշտոնական այցով ժամանել է Հարավային Կորեա: Այս մասին հայտնում է հարավկորեական Yonhap լրատվական գործակալությունը՝ հղում է կատարելով կառավարական աղբյուրներին:

Լրատվականը տեղեկացնում է, որ Պոմպեոյի այցը կշարունակվի մինչև մայիսի 2-ը: Ենթադրվում է, որ ԿՀՎ-ի պետի այցի նպատակը Հյուսիսային Կորեայի գործողությունների հանդեպ երկու երկրների մոտեցումների համակարգումն է: Աղբյուրի համաձայն՝ նա արդեն մի շարք հանդիպումներ է ունեցել հարավկորեացի պաշտոնյաների, այդ թվում նաև Հվ. Կորեայի Ազգային հետախուզության վարչության պետի հետ: Տեղեկություններ չկան այն մասին, թե արդյոք Պոմպեոն հանդիպել է նախագահի թեկնածուների հետ։

Հիշեցնենք, որ Հարավային Կորեայում նախագահական ընտրությունները տեղի են ունենալու մայիսի 9-ին:

Վերջին երկու ամիսների ընթացքում՝ Կորեական թերակղզում լարվածության ավելացման ֆոնին, Հարավային Կորեա են այցելել ԱՄՆ պետքարտուղար Ռեքս Թիլերսոնը, ինչպես նաև երկրի փոխնախագահ Մայքլ Փենսը: