Ռուսաստանը ՄԱԿ-ի Անվտանգության խորհուրդ է ներկայացրել Սիրիայում անվտանգության գոտիների ստեղծմանն աջակցող բանաձև

Ռուսաստանը ՄԱԿ-ի Անվտանգության խորհրդին է ներկայացրել Սիրայում անվտանգության գոտիների ստեղծման հուշագրին աջակցող բանաձևի նախագիծ: Այս մասին գրում է ՏԱՍՍ-ը՝ հղում կատարելով ՄԱԿ-ում ՌԴ մշտական ներկայացուցչության մամուլի ծառայությանը:

«Հաստատում ենք, որ բանաձևի նախագիծն արդեն ներկայացված է»,- ասել է ներկայացուցչության մամլո քարտուղար Ֆյոդոր Ստրժիժովսկին:

Դիվանագետների տեղեկացմամբ՝ բանաձևի քվեարկությունը տեղի կունենա այս շաբաթվա սկզբին՝ հավանաբար մայիսի 8-ին կամ 9-ին:

Հիշեցնենք, որ ավելի վաղ՝ մայիսի 4-ին, Աստանայում տեղի ունեցած բանակցությունների արդյունքում Ռուսաստանի, Իրանի և Թուրքիայի պատվիրակությունները համաձայնության էին եկել Սիրիայի տարածքում չորս անվտանգության գոտի ստեղծելու վերաբերյալ:

Համաձայնությունը ենթադրում է, որ մայիսի 6-ից այդ տարածքներում արգելվում է ռազմական գործողություններ իրականացնել, այդ թվում նաև ավիացիոն թռիչքներ: Փաստաթուղթը ուժի մեջ է վեց ամսով և կարող է երկարաձգվել նույնպիսի ժամկետով: ՌԴ պաշտպանության նախարարությունում ընդգծել են, որ Աստանայի համաձայնագրի ստորագրումը չի նշանակում «Իսլամական պետություն» և «Ջեբաթ ալ-Նուսրա» ահաբեկչական խմբավորումների դեմ պայքարի դադարեցում: