ՌԴ ՊՆ-ն մեկնաբանել է ամերիկյան հետախույզ-ինքնաթիռի հետ կապված միջադեպը
Մայիսի 9-ին Սև ծովի վրա օդ է բարձացել ռուսական Սու-30 կործանիչը։ Պատճառն ամերիկյան հետախույզ-ինքնաթիռն էր, որը մոտեցել էր Ռուսաստանի սահմաններին։ Այս մասին հայտնել են ՌԴ պաշտպանության նախարարությունից։
Նշվում է, որ միջադեպը տեղի է ունեցել 12:00-ի սահմաններում։ Մոտենալով նկատվող ինքնաթիռին՝ ռուս օդաչուն ֆիքսել է, որ դա ամերիկյան «Փոսեյդոն» հետախուզական ինքնաթիռ է։
«Ռուսական կործանիչը կատարել է «ողջունող» մանևրը, ինչից հետո ամերիկյան ինքնաթիռը, նկատելով մոտեցող կործանիչը, փոխել է երթուղին և հեռացել Ռուսաստանի սահմաններից։ Սու-30 ռազմական ինքնաթիռը բարեհաջող վերադարձել է իր կայանման վայր», - ասվում է ՌԴ պաշտպանության նախարարության հայտարարության մեջ։
Ավելի վաղ ամերիկյան NBC լրատվականը, հղում կատարելով ԱՄՆ պաշտպաության նախարարությանը, հայտնում էր, որ ռուսական կործանիչը մինչև 6 մետր մոտեցել է ամերիկյան հետախույզ-ինքնաթիռին, որը թռչելիս է եղել միջազգային օդային տարածքում։