Բրիտանական ԶԼՄ-ները վերջին խոշոր կիբերհարձակումների մեջ մեղադրում են Ռուսաստանին

Բրիտանական լրատվամիջոցներն ակնարկում են, որ Ռուսաստանը կապ ունի վերջին օրերի զանգվածային կիբերհարձակումների հետ, քանի որ «Shadow Brokers» հաքերային խմբավորումը սկսել է համակարգչային վիրուսներ տարածել այն բանից հետո, երբ ԱՄՆ-ն հրթիռային հարվածներ հասցրեց սիրիական ռազմաբազային: «Որոշ փորձագետների» կարծիքով դա վկայում է այն մասին, որ կիբերհանցագործները կապված են Ռուսաստանի հետ: Նրանք, սակայն, իրենց տեսակետն  ապացուցող ոչ մի փաստ չեն ներկայացնում:

Ինչպես գրում է The Telegraph պարբերականը, Սիրիայի ռազմաբազայի ռմբակոծումից հետո հաքերային խմբավորումը Թրամփին ուղղված «զգուշացում էր» հրապարակել՝ քննադատելով նրա որոշումը: Իսկ ահա մեկ շաբաթ անց «Shadow Brokers»-ը հաքերային հարձակում էր իրականացրել՝ օգտագործելով ամերիկյան Ազգային անվտանգության գործակալության (ԱԱԳ) կողմից մշակված վնասակար ծրագրերը: Ինչպես ենթադրվում է, վերջին հարձակման ժամանակ հենց այդ նույն ծրագրերն են օգտագործվել:

Այսօր՝ մայիսի 13-ին, «Կասպերսկու լաբարատորիան» գրանցել է ծածկագրող ծրագրով վարակելու մոտավորապես 45.000 փորձ աշխարհի 74 երկրներում, ընդ որում՝ վարակելու ամենաշատ փորձերն արվել են Ռուսաստանում:

Ռուսական լրատվամիջոցների փոխանցմամբ՝ խափանվել է Իսպանիայի ամենամեծ հեռահաղորդակցական կապը, կաթվածահար է եղել Մեծ Բրիտանիայի առողջապահական համակարգը, մի շարք հիվանդանոցներ չեն կարողանում մուտք գործել տվյալների բազա, քանի որ նրանց համակարգիչներն արգելափակված են 230 ֆունտ պահանջող դրամաշորթող ծրագրերով: Հարձակման են ենթարկվել ՌԴ ներքին գործերի նախարարության համակարգիչները. հաքերները մուտք են գործել նաև Գերմանիայի երկաթգծերի ղեկավարման համակարգեր: Հաքերային հարձակումը շարունակում է տարածվել Ասիայում, Հարավային և Հյուսիսային Ամերիկաներում: