Ռուսաստանի և ԱՄՆ-ի հարաբերությունները շուտ չեն կարգավորվի Օբամայի թողած «ժառանգության» պատճառով. ՌԴ նախագահի օգնական
Կրեմլը չի ակնկալում, որ ռուս-ամերիկյան բոլոր խնդիրներն արագ կլուծվեն, քանի որ ԱՄՆ նախկին նախագահ Բարաք Օբաման և նրա համախոհները խորը հետք են թողել այդ հարաբերությունների վրա. այս մասին լրագրողներին հայտարարել է ՌԴ նախագահի օգնական Յուրի Ուշակովը:
Նախագահի օգնականն ընդգծել է, որ ներկա պահին իրավիճակը բարդացնում են «ԱՄՆ-ի նախընտրական շրջանի սկանդալները՝ կապված Ռուսաստանի միջամտության հետ, որոնք դեռևս շարունակում են բուռն արձագանքներ ստանալ և խոչընդոտել երկխոսությունների հաստատմանը»:
«Ցավոք սրտի դա իրականություն է, և հնարավոր չէ դա չնկատել: Չնայած ԱՄՆ-ի ներքին քաղաքականության պաճառով առաջացած խնդիրներին՝ մեր երկրների ղեկավարները տրամադրված են կոնկրետ քայլեր ձեռնարկելուն»,- հայտարարել է Ուշակովը:
«Ակնհայտ է, որ աշխարհում բազում սուր հարցեր կան, որոնք պարզապես դժվար է և նույնիսկ անհնար է լուծել առանց Ռուսաստանի և ԱՄՆ-ի սերտ համագործակցության»,- համոզված է պաշտոնյան: Նրա կարծիքով՝ ուժերը միավորելու հնարավորություն կա: Որպես օրինակ Ուշակովը ներկայացրել է ահաբեկչության դեմ պայքարը, այդ թվում նաև սիրիական ուղղությամբ, ինչպես նաև այլ վտանգավոր սպառնալիքների դեմ միասնականությունը և տարածքային ճգնաժամային իրավիճակների կարգավորումը:
Նախագահի օգնականը հավաստիացրել է, որ Մոսկվան պատրաստ է ԱՄՆ-ի հետ հարաբերությունների վերկանգնմանը, միայն թե սպասում է Վաշինգտոնի կողմից նմանատիպ պատրաստակամության դրսևորմանը:
Կրեմլի ներկայացուցչի գնահատմամբ՝ ՌԴ ԱԳ նախարար Սերգեյ Լավրովի այցն ԱՄՆ ընդհանուր առմամբ ցույց տվեց, որ չնայած անցյալից մնացած խնդիրներին՝ երկու երկրները միասին աշխատելու բազմաթիվ հնարավորություններ ունեն: