«Պատահական հերոսը» գտել է կիբերհարձակումները դադարեցնելու միջոցը
The Guardian-ի փոխանցմամբ՝ «պատահական հերոսը», որը դադարեցրել է «Wanna Cry» դրամաշորթող ծրագրի տարածումը, պարզապես մի քանի դոլար է ծախսել վնասակար ծրագրում թաքնված տիրույթի անունը գրանցելու վրա:
Հաքերային հարձակումը քաոսային իրավիճակ էր ստեղծել բրիտանական «Ֆեդ-էքս» և «Տելեֆոնիկա» կազմակերպություններում, ինչպես նաև Մեծ Բրիտանիայի առողջապահական ծառայությունում, որտեղ մի շարք վիրահատություններ էին հետաձգվել վերոնշյալ հարձակումների պատճառով:
Բարեբախտաբար բրիտանական կիբերանվտանգության գիտաշխատողները «Proofpoint» անվտանգության ծառայության աշխատակից Դարիեն Հասի օգնությամբ կարողացել են գտնել և ակտիվացնել վնասակար ծրագրի «մահացու անջատումը»:
Անջատման հրահանգը կոդավորված է եղել ծրագրում, որպեսզի ցանկության դեպքում ստեղծողը կարողանա դադարեցնել դրա տարածումը:
«Այն ներառում էր բավականին երկար և անհեթեթ տիրույթի անվանում, և եթե այն ճիշտ է լրացվում, ապա ձեր կատարած հարցումը հետ է գալիս և ասում, որ տիրույթն ակտիվ է, որից հետո մահացու անջատումն ակտիվանում է, իսկ ծրագրի տարածումը՝ դադարում»,- բացատրում է «պատահական հերոսը»:
«Ես տեսա, որ տիրույթի անունը գրանցված չէ և մտածեցի, որ ճիշտ ուղու վրա եմ: Դա արժեցավ ընդամենը 10.69 դոլար», - մանրամասնել է նա:
«Մեր հերոսը ստացել է օրվա մրցանակը: Նա անգամ չէր էլ պատկերացնում, թե ինչքան է դանդաղեցրել վնասակար ծրագրի տարածումը», - հայտարարել է «Proofpoint» ընկերության փոխնախագահ Ռայան Քալեմբերը:
«Մահացու անջատումը չափազանց ուշ հայտնաբերվեց, և այլևս չկարողացավ օգնել Եվրոպային և Ասիային, որտեղ շատ կազմակերպություններ արդեն տուժել էին: Սակայն այն հնարավորություն կտա ԱՄՆ-ի օգտատերերին պաշտպանել իրենց համակարգերը»,- հավելել է Քալեմբերը: