Պուտինը վերջին հաքերային հարձակումների մեջ տեսնում է ամերիկյան հետք

ՌԴ նախագահ Վլադիմիր Պուտինը հայտարարել է, որ ավելի քան 150 երկրների հազարավոր համակարգիչներ վարակած WannaCry համակարգչային վիրուսի տարածման սկզբնաղբյուրը ամերիկյան հատուկ ծառայություններն են: Այս հայտարարությամբ նախագահն աջակցել է Microsoft ընկերության ղեկավար Բրեդ Սմիթի տեսակետը, որն ավելի վաղ մատնանշել էր կատարվածում ԿՀՎ-ի և Ազգային անվտանգության գործակալության (ԱԱԳ) ունեցած մեղավորությունը: Այս մասին գրում է «Ինտերֆաքսը»:

«Ռուսաստանն այս ամենի հետ ոչ մի կապ չունի: Ինձ համար տարօրինակ է որևէ այլ կարծիք լսելը»,- ընդգծել է Պուտինը:

ՌԴ նախագահը հավելել է, որ ռուսական հաստատություններն էական վնաս չեն կրել հաքերային հարձակման հետևանքով: «Սակայն սա ընդհանուր առմամբ անհանգստանալու տեղիք է տալիս»,- ամփոփել է նա:

Ավելի վաղ Microsoft ընկերության կայքում հայտնվել էր Բրեդ Սմիթի հայտարարությունը, որտեղ նա նշել էր, թե համոզված է ՝ զանգվածային հաքերային հարձակումը հնարավոր է դարձել, քանի որ ԿՀՎ-ն և ԱԱԳ-ն, իրենց շահերից ելնելով, տեղեկություններ են հավաքել ծրագրային ապահովման խոցելիության մասին:

Հիշեցնենք, որ մայիսի 12-ի երեկոյան սկսեցին լուրեր տարածվել համակարգիչների զանգվածային վարակումների մասին։ Տարբեր տեղեկությունների համաձայն՝վարակից ազատվելու համար օգտատերերից պահանջվել է վճարել 300-600 դոլար և գնել ծածկագիրը։

Ենթադրվում է, որ համակարգչային վիրուսը ստեղծողները որպես հիմք օգտագործել են ԱՄՆ ԱԱԳ-ի Eternal Blue վնասակար ծրագիրը: The Times-ի տեղեկությունների համաձայն՝ WannaCry վիրուսի հեղինակների շահույթը, մայիսի 15-ի տվյալներով, 42 հազար դոլար է կազմել, սակայն նրանք դեռևս չեն փորձել այդ գումարը կանխիկացնել: