ՄԱԿ-ի Անվտանգության խորհուրդը Փհենյանից պահանջում է դադարեցնել հրթիռային և միջուկային փորձարկումները

ՄԱԿ-ի Անվտանգության խորհուրդը դատապարտել է Հյուսիսային Կորեայի գործողությունները՝ կապված ապրիլի 28-ին և մայիսի 13-ին բալիստիկ հրթիռների փորձարկման հետ, և Փհենյանից պահանջել է դադարեցնել փորձարկումները. այս մասին ասվում է ՄԱԿ-ի Անվտանգության խորհրդի պաշտոնական հայտարարության մեջ:

Հիշեցնենք, որ վերջին փորձակումը տեղի է ունեցել մայիսի 13-ի գիշերը: Երկուշաբթի՝ մայիսի 15-ին, Հս. Կորեան պաշտոնապես հաստատեց միջին հեռահարության բալիստիկ հրթիռի հաջող արձակումը: Հրթիռի թռիչքը տևել է 30 րոոպե, իսկ թռիչքի հեռավորությունը կազմել է 800 կիլոմետր. այն ընկել է Ճապոնական ծովում՝ Ճապոնիայի հատուկ տնտեսական գոտուց դուրս:

Անվտանգության խորհրդի անդամները հայտարարել են, որ պատրաստ են Հս. Կորեայի դեմ ձեռնարկել բոլոր անհրաժեշտ քայլերը և ամենայն լրջությամբ պահանջել, որ մյուս երկրները հետևեն իրենց օրինակին:

Ռիա Նովոստիի փոխանցմամբ՝ խորհրդի անդամները կշարունակեն ուշադիր հետևել Փհենյանի գործողություններին և պատշաճ միջոցներ կձեռնարկեն, այդ թվում կկիրառվեն նաև նախկինում առաջարկված պատժամիջոցները:

Անվտանգության խորհուրդը նշել է, որ Հս. Կորեան պետք է կոնկրետ քայլեր ձեռնարկի երկիրը միջուկազերծելու և Կորեական թերակղզում լարվածությունը թուլացնելու համար: