ՄԱԿ-ի Անվտանգության խորհուրդն ԱՄՆ-ի առաջարկով քննարկում է Վենեսուելայի հարցը
Այսօր՝ մայիսի 17-ին, ՄԱԿ-ի Անվտանության խորհուրդը ոչ պաշտոնական փակ նիստում քննարկել է Վենեսուելայում տիրող իրավիճակը, որտեղ շարունակվում են անկարգություններով ուղեկցվող զանգվածային հակակառավարական ցույցերը: Այս մասին տեղեկացնում է ՏԱՍՍ-ը։
Աղբյուրի տեղեկությունների համաձայն՝ հանդիպման նախաձեռնությունը եղել է Միացյալ Նահանգներինը: Երեկ՝ մայիսի 16-ին, ամերիկյան երկրների կազմակերպության գլխավոր քարտուղար Լուիս Ալմագրոն հայտարարել էր, որ Վենեսուելայի անվտանգության ուժերն են պատասխանատու «այն ճնշումների համար, որոնք հանգեցրել են սպանությունների, ազատազրկումների և խոշտանգումների»:
Հիշեցնենք, որ Վենեսուելայում քաղաքական ճգնաժամ է: Երկրի տնտեսական վիճակից դժգոհ բնակիչները դուրս են գալիս փողոցներ՝ պահանջելով արտահերթ ընտրություններ նշանակել։ Լարվածությունը խիստ աճեց այն բանից հետո, երբ գերագույն դատարանը որոշում կայացրեց խստորեն սահմանափակել ընդդիմադիր կուսակցության լիազորությունները: Այս որոշումը ցույցերի առիթ դարձավ, որից հետո չեղյալ հայտարարվեց, սակայն դա այլևս չփրկեց իրավիճակը: Իրավապահ մարմինների տվյալներով՝ անկարգությունների զոհ է դարձել 46 մարդ, հազարավորները տուժել են: