Նյու Յորքում մեքենան մխրճվել է մարդկանց բազմության մեջ. հաղորդվում է մեկ զոհի մասին

Արտակարգ դեպք է տեղի ունեցել Նյու Յորքում։ Անհայտ անձը մեքենայով մխրճվել է հետիոտնային անցումի մոտ կանգնած մարդկանց բազմության մեջ։ Այս մասին հայտնում են ամերիկյան լրատվամիջոցները։

Ոստիկանության հայտնած նախնական տվյալների համաձայն՝ մեկ մարդ է զոհվել, ևս 22-ը վիրավորվել են։

«Մեքենայի տակ են ընկել 23 հոգի, որոնցից մեկը տեղում մահացել է։ Մնացածները տեղափոխվել են հիվանդանոց», - CBS-ին տված հարցազրույցում հայտնել է ոստիկանության աշխատակիցներից մեկը։

Նշվում է նաև, որ հիվանդանոց տեղափոխված վիրավորներից 4-ի վիճակը ծայրահեղ ծանր է։

Դեպքը տեղի է ունեցել Նյու Յորքի «Թայմ Սքուեըր» հրապարակում։ Ականատեսների վկայությամբ՝ մեքենան ոչ մեծ արագությամբ ընթանալիս է եղել, երբ հանկարծակի դուրս է եկել երթևեկելի գոտուց և վրաերթի ենթարկել մայթում կանգնած մարդկանց։

CNBC-ն հայտնում է, որ մեքենայի վարորդը փորձել է փախուստի դիմել, սակայն ոստիկանները բռնել են նրան։ Ավելի ուշ հայտնի է դարձել նաև նրա ինքնությունը՝ 26-ամյա Բրոնկա Ռիչարդ Ռոխաս։

Նյու Յորքի քաղաքապետը նշում է, որ տեղի ունեցածը կապ չունի ահաբեկչության հետ։

Սպիտակ տան մամուլի քարտուղար Շոն Սփայսերը հայտնել է, որ դեպքի մասին զեկուցվել է նաև նախագահ Դոնալդ Թրամփին։