Սիրիական սցենարը կարող է կրկնվել Վենեսուելայում. Նիկի Հեյլի
ԱՄՆ-ն չկարողացավ ՄԱԿ-ի Անվտանգության խորհրդին համոզել Վենեսուելայի հետ կապված քայլեր ձեռնարկել: Այս մասին լրագրողներին տեղեկացրել է ՄԱԿ-ում ԱՄՆ-ի մշտական ներկայացուցիչ Նիկի Հեյլին` ամփոփելով Անվտանգության խորհրդի՝ վենեսուելական ճգնաժամին վերաբերող փակ նիստի արդյունքները:
«Մենք չենք սպասում, որ Անվտանգության խորհուրդը քայլեր կձեռնարկի»,- ասել է դիվանագետը: Նրա խոսքերով՝ ԱՄՆ-ն խորհրդի նիստ էր հրավիրել, որպեսզի ուշադրություն հրավիրեր Վենեսուելայում տիրող իրավիճակի վրա և կոչ աներ Ամերիկյան պետությունների կազմակերպությանը ճգնաժամի քաղաքական կարգավորմանն ուղղված ավելի վճռական քայլեր ձեռնարկել:
Ինչպես հայտարարել է Հեյլին, խորհրդի նիստի ընթացքում տեղեկատվություն է ստացվել, որ Վենեսուելայի իշխանությունները պատրաստվում են 2,6 հազար աշխատակիցներից կազմված անվտանգության ուժեր ուղարկել երկրի հյուսիս-արևմտյան Տաչիրա նահանգ, որտեղ խոշոր անկարգություններ են տեղի ունեցել: «Իրավիճակը չի բարելավվում, այն վատթարանում է»,- նշել է ԱՄՆ-ի մշտական ներկայացուցիչը: Նրա կարծիքով՝ միջազգային հասարակությունը պետք է ստիպի այդ երկրի նախագահ Նիկոլաս Մադուրոյին «հարգել իր ժողովրդի իրավունքները»:
«Նույն իրավիճակը եղել է նաև Սիրիայում, Չինաստանում, Հարավային Սուդանում և Բուրունդիում: Մի՞թե հնարավոր չէ կանխել այդպիսի լուրջ իրավիճակների առաջացումը՝ Անվտանգության խորհրդի բաց նիստ հրավիրելու փոխարեն»,- նշել է Նիկի Հեյլին:
Ավելի վաղ Մեծ Բրիտանիայի մշտական ներկայացուցիչ Մեթյու Ռայքրոֆթը հայտարարել էր, որ վենեսուելական ճգնաժամը կարող է դառնալ զինված հակամարտություն, որը մեծ վտանգ կներկայացնի ամբողջ աշխարհի անվտանգությանը: