Շվեդիայի դատախազությունը դադարեցրել է WikiLeaks-ի հիմնադրի՝ բռնաբարության գործով հետաքննությունը
Շվեդիայի Գլխավոր դատախազությունը որոշել է դադարեցնել WikiLeaks-ի հիմնադիր Ժուլիան Ասանժի նկատմամբ անցկացվող հետաքննությունը և առաջարկել է դատարանին չեղարկել նրան ձերբակալելու մասին հրամանը։ Այս մասին գրում է New York Times-ը՝ հղում կատարելով Շվեդիայի դատախազության հայտարարությանը։
«Գլխավոր դատախազ Մարիան Նյուն որոշում է կայացել դադարեցնել հետաքննությունը Ասանժի նկատմամբ, որը կասկածվում էր բռնաբարություն կատարելու մեջ», - ասվում է դատախազության հայտարարության մեջ։
Շվեդիայի ոստիկանության հետաքննությունն Ասանժի նկատմամբ սկսել էր 2010 թ. ամռանը, երբ երկու կին հայտարարել էին, որ Ասանժը նրանց նկատմամբ սեռական ոտնձգություն է իրականացրել։ WikiLeaks-ի հիմնադիրը հերքել էր իրեն ուղղված մեղադրանքը՝ նշելով, որ սեռական հարաբերությունը տեղի է ունեցել փոխադարձ համաձայնությամբ։
Ասանժը ձերբակալվել է 2010 թ. դեկտեմբերին Լոնդոնում։ Շվեդիայի իրավապահները պնդում էին արտահանձնել Ասանժին, որը որոշ ժամանակ անց գրավի դիմաց բաց թողնվեց։
2012 թ. WikiLeaks-ի հիմնադիրը ապաստան խնդրեց Էկվադորի իշխանություններից (այդ ընթացքում նա գտնվել է Լոնդոնում Էկվադոի դեսպանատանը)։ Այդ ընթացքում վաղեմության ժամկետը լրանալու պատճառաբանությամբ նրա վրայից հանվել էր բռնաբարության մեղադրանքը։