Ջուլիան Ասանժը պատրաստվում է քաղաքական ապաստան խնդրել Ֆրանսիայից

WikiԼeaks ընկերության հիմնադիր Ջուլիան Ասանժը պատրաստվում է խնդրել Ֆրանսիային իրեն քաղաքական ապաստան տրամադրել: Նրա փաստաբան Ժուլիան Բրանկոյի հայտարարությունը փոխանցում է ՏԱՍՍ-ը:

«Կարծում եմ Ֆրանսիան ամենայն լրջությամբ պետք է մոտենա այս հարցին և քաղաքական ապաստան տրամադրի Ասանժին»,- ասել է փաստաբանը:

«Իմ պաշտպանյալն այժմ փորձում է դուրս գալ Լոնդոնում Էկվադորի դեսպանատնից և խնդրում է Ֆրանսիային համապատասխան քայլ անել և ընդունել իրեն՝ ԱՄՆ-ի հետապնդումներից պաշտպանելու համար», - հայտարարել է Բրանկոն:

Փաստաբանի խոսքերով՝ Ասանժը բոլոր հիմքերն ունի ենթադրելու, որ իրեն կարտահանձնեն ԱՄՆ-ին, եթե նա դուրս գա լատինամերիկյան երկրի դեսպանատնից: «Նրան սպառնացել են ցմահ ազատազրկել. նախագահ Թրամփն անձամբ է սպառնալիքներ հնչեցրել նրա հասցեին մի քանի շաբաթ առաջ»,- պարզաբանել է Բրանկոն:

Բացի այդ, ինչպես տեղեկացնում է ՏԱՍՍ-ը, Վեսթմինսթերի առաջին ատյանի դատարանը Ջուլիան Ասանժին ձերբակալելու հրաման էր արձակել, երբ նա 2012 թ. հունիսի 29-ին չէր ներկայացել դատարան: Թեև Շվեդիայի դատախազությունը դադարեցրել է Ասանժի՝ բռնաբարության գործով հետաքննությունը, այդ ձերբակալման հրամանը ուժի մեջ է մնում, և Լոնդոնի ոստիկանությունը պարտավոր է ձերբակալել նրան Էկվադորի դեսպանատնից դուրս գալուն պես:

Ավելի վաղ՝ 2015 թ., Ասանժը բաց նամակ էր ուղղել Ֆրանսիայի նախկին նախագահ Ֆրանսու Օլանդին՝ խնդրելով իրեն քաղաքական ապաստան տրամադրել: Այդ ժամանակ Ելիսեյան պալատը մերժել էր Ասանժի խնդրանքը: Նրա փաստաբանը հույս է հայտնել, որ նոր նախագահ Էմանուել Մակրոնի դիրքորոշումը այլ կլինի: