Ռուսաստանը փորձել է ազդեցություն գործել Թրամփի վրա. NYT

Անցյալ ամռանը ամերիկյան հետախուզությունը տեղեկություն էր հավաքել, որի համաձայն՝ ռուսական քաղաքական ղեկավարությունն իբր քննարկել է հարցը, թե ինչպես կարելի է ազդել Դոնալդ Թրամփի վրա վերջինիս խարհրդականների միջոցով։ Այս մասին գրում է New York Times-ը՝ հղում կատարելով գործող և նախկին մի քանի պաշտոնյաների, որոնց անունները չեն նշվում։

Պարբերականի տվյալների համաձայն՝ խոսքն այդ ժամանակ Թրամփի նախընտրական շտաբի պետ Փոլ Մանաֆորտի և թոշակի անցած գեներալ Մայքլ Ֆլինի մասին է. վերջինս  նշանակվել էր անվտանգության հարցերով նախագահի խորհրդականի պաշտոնում։

Ռուսական «Լենտա» պարբերականի փոխանցմամբ՝ Մոսկվան բազմիցս մեղադրվել է ամերիկյան նախագահական ընտրություններին միջամտելու հարցում։ Այդպիսի պնդումներ են առաջ քաշվել հունվարին հրապարակված մի գաղտնի զեկույցում, որը կազմվել էր Կենտրոնական հետախուզական վարչության, Հետախուզությունների դաշնային բյուրոյի և ԱՄՆ-ի Ազգային անվտանգության գործակալության կողմից։ Զեկույցում ասվում էր, թե նախագահ Պուտինն անձամբ է հանձնարարել այնպիսի ընկերություն հիմնել, որը կարատավորի դեմոկրատ թեկնածու Հիլարի Քլինթոնի անունը և կապահովի Թրամփի հաղթանակը։

Ավելի վաղ՝ մայիսի 17-ին, ԱՄՆ-ում հատուկ խորհրդական է նշանակվել, որը զբաղվում է «2016 թ. նախագահական ընտրություններին Ռուսաստանի միջամտության» գործի հետաքննությամբ։ Այդ լիազորություններն իրականացնում է ԱՄՆ արդարադատության նախարարության նախկին պաշտոնյա, ՀԴԲ-ի նախկին ղեկավար Ռոբերտ Մյուլլերը։

Այս առիթով ՌԴ նախագահի մամլո խոսնակ Դմիտրի Պեսկովը նշել է, որ Մոսկվան արդեն հոգնել է այդ մեղադրանքներից, և կատարվածը «վհուկների որս է» անվանել։ Դոնալդ Թրամփը նույն բառերով է բնութագրել ստեղծված իրավիճակը՝ հավելելով, որ ռուսական հարցերով զբաղվող հատուկ դատախազի նշանակումը վնասում է ԱՄՆ-ին։