Հիլարի Քլինթոնը տեղյակ է եղել Սաուդյան Արաբիայի և Կատարի կողմից ահաբեկիչներին ցուցաբերած աջակցության մասին. Վիկիլիքս
ԱՄՆ նախկին պետքարտուղար, նախագահի նախկին թեկնածու Հիլարի Քլինթոնն իմացել է, որ Կատարը և Սաուդյան Արաբիան ֆինանսական օգնություն են տրամադրել Սիրիայի և Իրաքի ահաբեկիչներին։ Այս մասին ասվում է «Վիկիլիքս»-ի կողմից հրապարակված Քլինթոնի էլեկտրոնային նամակներում, որոնց հղումը մայիսի 5-ին տեղադրվել էր կազմակերպության թվիթերյան էջում։
Հրապարակած նամակը, որը Քլինթոնը գրել է 2014 թ. օգոստոսի 17-ին, ուղղված է նրա նախընտրական շտաբի ղեկավար Ջոն Պոդեստին։ Նամակում նշվում է Սիրիայում և Իրաքում տիրող իրավիճակի և այնտեղ գործող «Իսլամական պետություն» ահաբեկչական խմբավորման դեմ պայքարի միջոցների մասին։ Քլինթոնը հիշատակում է զինյալների դեմ պայքարում քրդական «փեշմերգա» և «Սիրիական ազատ բանակ» խմբավորումներին ներգրավելու հնարավորությունը։
«Քանի դեռ այս պատերազմական և կիսապատերազմական վիճակը շարունակվում է, մենք պետք է օգտագործենք մեր դիվանագիտական կարողությունները Կատարի և Սաուդյան Արաբիայի վրա ճնշում գործադրելու համար, քանի որ նրանք գաղտնի ֆինանսական աջակցություն են ցույց տալիս ԻՊ-ին և տարածաշրջանում այլ ծայրահեղական խմբավորումներին»-, ասվում է նամակում։
Հիշեցնենք, որ մայիսի 5-ին Կատարի հետ դիվանագիտական հարաբերությունները խզել են Բահրեյնը, ԱՄԷ-ն, Սաուդյան Արաբիան, Եգիպտոսը, Եմենը, Լիբիան, Մալդիվյան հանրապետությունը և Մավրիկին։
Կատարի իշխանություններն իրենց ափսոսանքն են հայտնել հարևան երկրների որոշումների առիթով և դրանք անվանել չհիմնավորված։