Times-ը նոր մանրամասներ է հաղորդել Լոնդոնի ահաբեկչության վերաբերյալ
Հունիսի 3-ի Լոնդոնի ահաբեկչությունն իրականացնողներից մեկը պակիստանական ծագմամբ բրիտանացի Հուրամ Շազադ Բաթն է, որը 2005 թ. Լոնդոնի մետրոյի ահաբեկչության հետ կապ ունեցող Սաջիլ Շահիդի մոտ ընկերն է եղել. գրում է Times թերթը։
Թերթի տվյալների համաձայն՝ Բաթն աշխատել է Լոնդոնի արևելյան հատվածում գտնվող, մուսուլմաների համար նախատեսված ֆիթնես ակումբում, որը պատկանում է 42-ամյա Շահիդին։ Ենթադրվում է , որ վերջինս «Ալ Քաիդա»-ին օգնել է 2005 թ. հուլիսին լոնդոնյան մետրոյում պայթյուններ իրականացնելու հարցում։
Բաթը «Ummah Fitness» ակումբում շաբաթական մի քանի ժամ էր անցկացնում՝ օգնելով խառը մարտարվեստների պարապմունքների ժամանակ։ Times-ը նշում է, թե հավանաբար նրա պարտականությունների մեջ է մտել նաև պարապմունքներին հաճախող երիտասարդների ծայրահեղականացումը։
Հիշեցնենք, որ հունիսի 3-ի երեկոյան Լոնդոնի կամուրջի վրա եղած անցորդների խմբի մեջ է մխրճվել մի ավտոմեքենա, որից դուրս եկած երեք զինված անձինք հարձակվել էին հետիոտների վրա։ Ահաբեկիչներն սպանվել էին ոստիկանության աշխատակիցների կողմից։ Ահաբեկչական գործողության հետևանքով յոթ մարդ էր զոհվել, 48-ը ստացել էին տարբեր աստիճանի մարմնական վնասվածքներ, մի քանիսը ծանր վիճակում են։