Ամերիկացի ցանցահենները գրոհում են նախագահ Պուտինի կայքը. Պեսկով
ԱՄՆ-ի տարածքից ամեն օր Ռուսաստանի վրա հաքերային հարձակումներ են իրականացվում. այս մասին հայտարարել է ՌԴ նախագահի մամլո խոսնակ Դմիտրի Պեսկովը։
Նրա խոսքով՝ հարձակման թիրախ է դարձել նաև նախագահ Պուտինի կայքը։
Լրագրողների հարցին, թե արդյոք հարձակումներն իրականացվում են ամերիկյան հատուկ ծառայությունների կողմից, Պեսկովը պատասխանել է. «Խոսքը ԱՄՆ-ի տարածքից եկող հարձակումների մասին է։ Ես չեմ ցանկանում անհիմն հայտարարություններ անել՝ ասելով, թե այս ամենի հետևում պաշտոնական Վաշինգտոնն է կանգնած։ Որևէ երկրի տարածքից կատարված հաքերային հարձակումը չի նշանակում, որ կառավարությունը կապ ունի դրա հետ»։
«Ռիա Նովոստի»-ի փոխանցմամբ՝ վերջերս ՌԴ արտգործնախարարությունը տեղեկացրել է, թե ամերիկյան հատուկ ծառայությունները սպառնացել են մեծածավալ կիբերհարձակում իրականացնել Ռուսաստանի դեմ։ ԶԼՄ-ների միջոցով նրանք ցույց են տվել, որ ցանկացած պահի կարող են հարձակում գործել ռուսական առանցքային գերատեսչական կառույցների վրա։
ՌԴ ԱԳՆ-ն հավելել է, որ ռուսական էլեկտրոնային ենթակառուցվածքի վրա կատարվող հարձակումների 28%-ն իրականացվում է ԱՄՆ-ի տարածքից։
Ինչպես նշում է «Ռիա Նովոստի»-ն, Մոսկվան բազմիցս Վաշինգտոնին առաջարկել է երկկողմ խորհրդակցություններ անցկացնել կիբերհանցագործությունների դեմ պայքարելու համար։ Ամերիկյան վարչակազմն ամեն անգամ խուսափել է պատասխան տալուց։