Կրեմլն զգուշացրել է Վաշինգտոնին փոխադարձ պատժամիջոցներ կիրառելու հավանականության մասին
Ռուսաստանի նկատմամբ կիրառվող պատժամիջոցների ցանկը մեծացնելու ԱՄՆ-ի Կոնգրեսի ցանկությունը կարող է փոխադարձ պատժամիջոցների ալիք բերել։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։
«Մենք չէինք ցանկանա հասնել պատժամիջոցների գագաթնակետին, սակայն դա մեր որոշումը չէր», - Պեսկովի խոսքերը փոխանցում է lenta.ru-ն։
Նրա խոսքով՝ վաղ է գնահատականներ տալ, քանի որ ամերիկացի սենատորների հայտարարությունները դեռ իրականություն չեն դարձել։
«Վերջին ժամանակներում Վաշինգտոնում այնքան նպատակներ և ծրագրեր են մշակվում, որ անհնար է հետևել այդ ամբողջին», - շարունակել է Պեսկովը։
Հակառուսական պատժամիջոցներն ավելացնելու՝ ԱՄՆ-ի սենատի որոշման մասին պարզ էր դարձել դեռ հունիսի 12-ին։ Նշվում էր, որ սենատորները ցանանում են Սպիտակ տանը զրկել գործող պատժամիջոցները չեղարկելու իրավունքից։
Ամերիկացի սենատորները պատժամիջոցների խստացման մասին օրինագիծը քննարկելու են այսօր՝ հունիսի 15-ին։ Եթե այդ որոշումն ընդունվի, ամերիկյան ընկերություններին ինչպես նաև մասնավոր անձանց կարգելվի երկու շաբաթը գերազանցող ժամանակահատվածի համար վարկավորել ռուսական բանկերը։