Հավանան դատապարտել է Թրամփի՝ Կուբայի հանդեպ քաղաքականության խստացման վերաբերյալ որոշումը
Կուբայի իշխանությունները դատապարտել են ԱՄՆ նախագահ Դոնալդ Թրամփի՝ իրենց երկրի նկատմամբ քաղաքականության խստացման վերաբերյալ որոշումը: Այս մասին տեղեկացնում է ՏԱՍՍ-ը՝ հղում կատարելով Կուբայի կառավարության հայտարարությանը:
Հավանայում Սպիտակ տան նախաձեռնությունն անվանել են «հետընթաց կուբա-ամերիկյան հարաբերություններում»: Այդուհանդերձ, Կուբան պատրաստ է շարունակել ԱՄՆ-ի հետ երկխոսությունը:
«Մայամիում ունեցած ելույթի ընթացքում ԱՄՆ նախագահ Դոնալդ Թրամփը՝ լի թշնամական հռետորաբանությամբ և հիշեցնելով մեր երկրի հետ բաց առճակատման ժամանակները, հայտարարեց Կուբայի հանդեպ իր վարչակազմի քաղաքականության մասին, որը չեղարկում է նախորդ երկու տարիներին գրանցված առաջընթացը»,- ասվում է հայտարարության մեջ:
Կուբայի կառավարությունը հայտարարել է նաև, որ պատրաստվում է շարունակել «ԱՄՆ-ի կառավարության հետ հարգալից երկխոսությունը և համագործակցությունն այն ոլորտներում, որոնք փոխադարձ հետաքրքրություն են ներկայացնում»:
Հավանայում ընդգծել են նաև, որ Կուբայի ժողովուրդը երբեք չի հրաժարվի իր ինքնավարությունից և անկախությունից: «Ցանկացած ռազմավարություն՝ ուղղված Կուբայում քաղաքական, տնտեսական և սոցիալական համակարգերի փոփոխմանը, լինի դա ճնշման միջոցով թե ավելի սրամիտ մեթոդների կիրառմամբ, դատապարտված է ձախողման»,- նշվում է հայտարարության մեջ:
Հիշեցնենք, որ հունիսի 16-ին Մայամիում ունեցած ելույթի ընթացում Դոնալդ Թրամփը հայտարարել է, որ մասնակիորեն հրաժարվում է Կուբայի հանդեպ իրեն նախորդող Բարաք Օբամայի ունեցած քաղաքականությունից: Թրամփի վարչակազմը ավելի խիստ սահմանափակումներ է դնում մասնավորապես դեպի կղզի կատարվող ամերիկյան զբոսաշրջության վրա: Նա պատրաստվում է արգելել նաև կուբական ռազմական կառույցների հետ կապված անձանց գործարքների իրականացումը ԱՄՆ-ի իրավասության շրջաններում: Այդուհանդերձ, Թրամփը ուժի մեջ է թողել Օբամայի դիվանագիտական նվաճումներից շատերը, այդ թվում նաև ամերիկյան դեսպանատան աշխատանքը Հավանայում:
Սպիտակ տանը հայտարարել են, որ Կուբայի հանդեպ պատժամիջոցները կշարունակվեն այնքան, մինչև Հավանան քաղաքական և տնտեսական ազատականացմանն ուղղված քայլեր ձեռնարկի:
2014 թ. դեկտեմբերին ԱՄՆ-ի և Կուբայի առաջնորդներ Բարաք Օբաման և Ռաուլ Կաստրոն հայտարարել են երկկողմ հարաբերությունների բարելավման նախաձեռնության մասին: Վերականգնվել են դիվանագիտական կապերը, վերսկսվել են կանոնավոր առևտրային թռիչքները և մեղմացվել են մի շարք հակակուբական պատժամիջոցներ: Այնուամենայնիվ, 1959 թ. հեղափոխությունից հետո ամերիկյան կառավարության կողմից սահմանված առևտրային արգելքը գործում է մինչև օրս: