Ահաբեկչություն՝ Բրյուսելի կայարաններից մեկում

Եվրոպայում հերթական ահաբեկչությունն է տեղի ունեցել: Հունիսի 21-ին՝ կեսգիշերն անց, անհայտ անձը Բրյուսելի կենտրոնական կայարանի տոմսարկղերի մոտ պայթուցիկ սարք է գործի դրել. այս մասին հայտնում ն բելգիական լրատվամիջոցները:

Չարագործին ամբոխի մեջ նկատել է զինվորական պարեկը. նրան մատնել են հագուստի տակից երևացող լարերը: Զինվորականները մոտեցել են կասկածելի անձին, որից հետո պայթյուն է որոտացել: Հասկանալով, որ գրավել է իրավապահ մարմինների ուշադրությունը՝ ահաբեկիչը գործի է դրել պայթուցիկ սարքը, որի տեսակը դեռևս հայտնի չէ:

Նշվում է, որ պայթյունն այնքան էլ ուժգին չի եղել․ տուժածներ չկան: Ականատեսների խոսքերով՝ դեպքի վայրը ծածկված է եղել ծխով, բայց իրավապահ մարմինները և կայարանի աշխատակիցները կարողացել են արագ տարհանում իրականացնել:

Թագավորության ներքին գործերի նախարար Յան Յաբմոնը, ելույթ ունենալով VTM հեռուստաալիքի  եթերում, տեղեկացրել է, որ ահաբեկչի պայթուցիկ սարքը բավականին հզոր է եղել, սակայն չի գործել այնպես, ինչպես մահամարտն էր նախատեսել:

Յաբմոնը հայտնել է նաև, որ ահաբեկչի ինքնությունն արդեն պարզվել է. նա վաղուց է հայտնի եղել ոստիկանությանը: Նախարարությունն այլ մանրամասներ չի հաղորդել: Նախարարը միայն նշել է, որ ոստիկանների և զիվորականների ճիշտ ժամանակին արված միջամտությունը կանխել է մեծամասշտաբ ահաբեկչական գործողությունը:

Բելգիայի դաշնային դատախազությունը հետաքննում է դեպքը որպես ահաբեկչություն: Վարչապետ Շառլ Միշելը Անվտանգության խորհրդի արտահերթ նիստ է հրավիրել: Ահաբեկչական սպառնալիքի մակարդակը դեռևս մնում է անփոփոխ՝ երրորդ՝ նախավերջին աստիճան:

Պայթյունից անմիջապես հետո ոստիկանությունն ամբողջությամբ շրջափակել է քաղաքի կենտրոնը և տարհանել մարդկանց ոչ միայն Կենտրոնական կայարանից, այլ նաև Գրան-պլյաս կենտրոնական հրապարակից, դրան հարակից մի քանի փողոցներից, մոտակա ռեստորաններից և շենքերից՝ իրենց գործողությունները բացատրելով ահաբեկչության վտանգի սպառնալիքով:

Նշենք, որ Բելգիայում մի քանի ահաբեկչական գործողություններ էին իրականացվել նաև 2016 թ. մարտին, որոնց հետևանքով 32 մարդ էր զոհվել, իսկ 300-ը ստացել էր տարբեր աստիճանի մարմնական վնասվածքներ: