ՆԱՏՕ-ի կործանիչը փորձել է մոտենալ ՌԴ պաշտպանության նախարարի ինքնաթիռին

Հյուսիսատլանտյան դաշինքին պատկանող F-16 կործանիչը մոտեցել է Բալթիկ ծովի չեզոք գոտու վրայով թռչող ՌԴ պաշտպանության նախարար Սերգեյ Շոյգուի օդանավին, սակայն նրան «հեռացրել» է ռուսական Սու-27-ը. այս մասին տեղեկացնում է Ռիա Նովոստի-ն:

ՆԱՏՕ-ի ինքնաթիռները  ցանկացել են հետևել Շոյգուի ինքնաթիռին, երբ նա մեկնում էր Կալինինգրադ: Նախարարի ինքնաթիռն ուղեկցվել է ռազմածովային Սու-27 կործանիչներով:

Դաշինքի ինքնաթիռներից մեկը փորձել է մոտենալ Շոյգուի օդանավին, բայց Սու-27-ը հայտնվել է նրանց մեջտեղում: Կործանիչը, թափահարելով թևերը,  դաշինքի ինքնաթիռին «ցույց է տվել», որ զինված է, որից հետո F-16-ը նահանջել է:

Կրեմլում չեն մեկնաբանել միջադեպը՝ խնդրելով բոլոր հարցերն ուղղել պաշտպանության նախարարությանը:

Ինչպես հաղորդում է Ռիա Նովոստի-ն, այսօր՝ հունիսի 21-ին, Շոյգուն ռազմական գերատեսչության արտագնա նիստ է անցկացրել Կալինինգրադում, որի ընթացքում քննարկվել են արևմտյան ռազմավարական ուղղությանն անչվող անվտանգության հարցերը:

Հիշեցնենք, որ վերջերս ռուսական Սու-27 կործանիչը կանխել էր Բալթիկ ծովի վրայով թռչող ամերիկյան RC-135 հետախուզական ինքնաթիռի գործողությունները: Պաշտպանության նախարարությունում ընդգծել են, որ ռուսական կործանիչների թռիչքները Բալթիկի չեզոք ջրերի վրայով իրականացվում են միջազգային կանոնների համաձայն: