Ավստրիայի արտգործնախարարը կոչ է անում փակել երկրում մուսուլմանական մանկապարտեզները

Վիեննայում մուսուլմանական մանկապարտեզները պետք է փակել, քանի որ դրանք չեն նպաստում երեխաների՝ հասարակության ինտեգրացմանը։ Այս մասին հայտարարել է Ավստրիայի արտգործնախարար, ԵԱՀԿ գործող նախագահ Սեբաստիան Կուրցը։

«Մանկապարտեզները պետք է նախապատրաստեն երեխաներին դպրոցի համար, սովորեցնեն գերմաներեն խոսել, սակայն այսպես կոչված մուսուլմանական մանկապարտեզներն առանձնանում են էթնիկական և լեզվական սկզբունքով։ Այդպիսինները մեզ պետք չեն։ Մեզ մոտ չպետք է լինեն մուսուլմանական մանկապարտեզներ», - Վիեննայի բանավեճի ակումբուն ունեցած «ապագա միգրացիան» թեմայով ելույթի ժամանակ հայտարարել է Կուրցը։

Նրա խոսքով՝ այսպիսի մանկապարտեզները մշակութային և լեզվական առումով մեկուսանում են հասարակությունից, չեն ցանկանում ֆինանսավորում ստանալ հարկատուների հաշվին։

«Նման մոտեցնումն անտրամաբանական է, լավագույն ինտեգրացիայի բանալին գերմաներենին տիրապետելն է։ Երեխաները պետք է սովորեն այդ լեզուն դեռ վաղ տարիքից», - ավելացրել է Կուրցը։

Ներկայումս Վիեննայում մոտ 10 հազար երեխա հաճախում է մուսուլմանական մանկապարտեզներ։ Ավստրիայի արտգործնախարարը կոչ է անում խստացնել այս մանկապարտեզներում դայակների և մանկավարժների՝ գերմաներենի իմացության պահանջը։