Սերգեյ Շոյգուի ինքնաթիռին մոտեցած կործանիչը պատկանում է Լեհաստանի ռազմաօդային ուժերին

Լեհաստանի ռազմաօդային ուժերի հրամանատարությունը հայտնում է, որ ՆԱՏՕ-ի պարեկային F-16 կործանիչը, որը մոտեցել էր  Բալթիկ ծովի չեզոք գոտու վրայով թռչող ՌԴ պաշտպանության նախարար Սերգեյ Շոյգուի օդանավին, կառավարվել է լեհ օդաչուի կողմից։ Համապատասխան հայտարարությունը կարելի է գտնել հրամանատարության պաշտոնական կայքում։

Հաղորդվում է, որ «հունիսի 21-ին համակարգված գործողությունների կենտրոնից տագնապ հայտարարվեց լեհական երկու F-16 ինքնաթիռների համար, որոնք պետք է հսկողություն իրականացնեին Բալթիկ ծովի տարածքում։ Նրանք նախանշել էին երեք թիրախ՝ Ռուսաստանի Դաշնությանը պատանող մեկ ՏՈւ-154 և երկու Սու-27։ Առաջինը զինված չէր։ Գործողությունը կատարվել է համաձայն ՆԱՏՕ-ի ընթացակարգերի»։

Հիշեցնենք, որ հունիսի 21-ին Հյուսիսատլանտյան դաշինքին պատկանող F-16 կործանիչը մոտեցել էր Բալթիկ ծովի չեզոք գոտու վրայով թռչող ՌԴ պաշտպանության նախարար Սերգեյ Շոյգուի օդանավին, սակայն նրան «հեռացրել» էր ռուսական Սու-27-ը՝ հայտնվելով նրանց մեջտեղում: Կործանիչը, թափահարելով թևերը,  դաշինքի ինքնաթիռին «ցույց է տվել», որ զինված է, որից հետո F-16-ը նահանջել է: