Ռուսաստանը մեղադրվում է բրիտականան խոհրդարանի վրա իրականացված կիբերհարձակման մեջ. The Guardian

Ռուսական իշխանություններին կասկածում են բրիտանական խորհրդարանի համակարգչային ցանցի վրա հաքերային հարձակում իրականցնելու մեջ. այս մասին տեղեկացնում է The Guardian թերթը:

Կիբերհարձակման մասին առաջին լուրերը հայտնի դարձան շաբաթ՝ հունիսի 24-ին: The Telegraph-ի տվյալներով՝ պատգամավորները չեն կարողացել մուտք գործել իրենց էլեկտրոնային փոստեր: Խորհրդարանի պաշտոնական ներկայացուցիչը տեղեկացրել է, որ ավելի քան 90 էլեկտրոնային էջեր են կոտրվել (Sky News-ի տվյալներով՝ դա ընդհանուր օգտատերերի թվի մոտավորապես 1%-ն է): Նրա խոսքերով՝ այդ էջերի օգտատերերը թույլ գաղտնաբառեր են օգտագործել՝ հաշվի չառնելով զգուշացումները:

Թերթի փոխանցմաբ՝ «վնասված» ցանցում աշխատել են բոլոր խորհրդարանականները՝ այդ թվում վարչապետ Թերեզա Մեյը և կառավարության անդամները:

Բրիտանական հատուկ ծառայությունները ենթադրում են, որ հարձակման հետևում կանգնած է ոչ թե միայնակ ցանցահենների խմբավորումը, այլ որևիցե օտարերկյա կառավարություն: The Guardian-ը նշում է, որ Ռուսաստանից բացի կասկածվում են նաև Չինաստանը և Իրանը:

«Դա խիստ ուժային հարված էր՝ ամենայն հավանականությամբ ծրագրավորված որևէ երկրի կողմից»,- թերթին հայտնել է անվտանգության կառույցում աշխատող աղբյուրը:

Նշենք, որ փետրվարին բրիտանական կուսակցությունները դիմել էին հատուկ ծառայությունների օգնությանը՝ պարզելու համար ԶԼՄ-ների հայտարարություններն այն մասին, թե Ռուսաստանը միջամտել է ԱՄՆ-ի նախընտրական գործընթացին: Այդ ժամանակ կիբերանվտանգության կենտրոնի տնօրեն Սիրան Մարտինը հավաստիացրել էր, որ «հսկողության տակ կվերցնի» կուսակցությունների էլեկտրոնային գործունեությունը և նրանց տվյալների բազան:

Արևմտյան քաղաքական գործիչները պարբերաբար մեղադրում են «ռուսական ցանցահեններին» իրենց ընտրական գործընթացներին խառնվելու մեջ: Այդպիսի հայտարարություններով են հանդես եկել մասնավորապես ԱՄՆ-ի Դեմոկրատական կուսակցության ներկայացուցիչները և Ֆրանսիայի նախագահ Էմանուել Մակրոնը:

Ռուսաստանը բազմիցս հերքել է այդ բնույթի մեղադրանքները: Կրեմլում դրանք անվանել են «բացարձակապես անհիմն»: ՌԴ նախագահ Վլադիմիր Պուտինը նշել է, որ ԱՄՆ-ն միջամտում է ամբողջ աշխարհի քաղաքական գործընթացներին և մեղադրում Ռուսաստանին ամերիկյան նախագահական ընտրությունների արդյունքների վրա ազդելու մեջ, որը Մոսկվայի համար ոչ մի իմաստ չունի: