Էրդողանն աջակցում է արաբական երկրների պահանջների վերաբերյալ Կատարի դիրքորոշումը
Թուրքիայի նախագահ Ռեջեփ Թայիփ Էրդողանը համակարծիք է Կատարի իշխանությունների հետ՝ կապված դիվանագիտական ճգնաժամը հաղթահարելու համար արաբական երկրների կողմից առաջարկված պահանջների անպատեհության հետ. այս մասին տեղեկացրել է «Ռոյթերս» գործակալությունը:
«Թեև նրանք մեզ չեն ներկայացրել իրենց պահանջները, բայց խնդրել դուրս բերել թուրքական զորքերը Կատարից վիրավորական է Թուրքիայի համար»,- Էրդողանի խոսքերը փոխանցում է գործակալությունը:
Թուրքիայի նախագահը հավելել է, որ արաբական երկրների կողմից Կատարին ներկայացված պահանջները խախտում են միջազգային իրավունքը:
«Եթե խոսքն այդ 13 պայմանների մասին է, ապա մենք աջակցում և միանում ենք Կատարին: Այդ ցուցակը չի համապատասխանում միջազգային իրավունքին»,- ընդգծել է Էրդողանը:
Ավելի վաղ Կատարի կառավարությունը արաբական երկրների պահանջներն անիրականանալի էր անվանել՝ նշելով, որ դրանք ոչ մի կապ չունեն ահաբեկչության դեմ պայքարի հետ, և դրանց հիմնական նպատակը երկրի ինքնիշխանությունը սահմանափակելն է:
Նշենք, որ ավելի վաղ Կատարի հետ դիվանագիտական կապերը խզած Սաուդյան Արաբիան, Բահրեյնը, ԱՄԷ-ն և Եգիպտոսը Դոհային 13 պայման էին ներկայացրել՝ շրջափակումը վերացնելու համար: Տեղեկությունների համաձայն՝ դրանց թվում են Իրանի հետ դիվանագիտական հարաբերությունների մակարդակի իջեցումը, «Ալ Ջազիրա» հեռուստաալիքի փակումը, Թուրքիայի հետ ռազմական համագործակցության դադարեցումը և երկրում թուրքական ռազմաբազայի փակումը: Բացի այդ Կատարը պարտավորվում է տուգանք վճարել պահանջները ներկայացրած երկրներին: Այս պահանջների ցուցակը Կատարին է փոխանցվել Քուվեյթի միջոցով։