Պենտագոնը ցանկանում է ՄԱԿ-ի միջոցով օրինականացնել իր գաղտնի գործողությունները
ԱՄՆ-ն հանդես է եկել «Ալ Քաիդա» և «Իսլամական պետություն» ծայրահեղական խմբավորումների տարածաշրջանային խմբերը ՄԱԿ-ի ահաբեկչական խմբավորումների ցուցակում ներառելու առաջարկով. այս մասին տեղեկացնում է «Իզվեստիա» թերթը՝ հղում կատարելով ռուսական դիվանագիտական շրջանակների բարձրաստիճան աղբյուրներին:
«Այդ առաջարկին կտրուկ դեմ է Եգիպտոսը, որը Սինայի թերակղզում պայքարում է «Ալ Քաիդա»-ի դեմ: Կահիրեում կարծում են, որ տարածաշրջանային խմբավորումների ներառումը միջազգային ցուցակում կնշանակի, որ երկրի իշխանություններն ինքնուրույն չեն կարողանում դիմակայել սպառնալիքին»,- հայտնել է թերթի զրուցակիցը:
Նա հավելել է նաև, որ Ռուսատանում նույնպես թերահավատորեն են մոտենում այդ գաղափարին, քանի որ «Ալ Քաիդա»-ի և «Իսլամական պետության» խմբերը հիմնականում սակավաթիվ են և իշխանությունները կարող են ինքնուրույն պայքարել դրանց դեմ:
Այդ առաջարկի ընդունման դեպքում Վաշինգտոնը, համաձայն ամերիկյան օրենսդրության, կարող է հատուկ գործողություններ նախաձեռնել այլ երկրների տարածքներում: Ներկա պահին ամերիկյան զինվորականները այլ երկրների սահմաններում ահաբեկչական խմբավորումների դեմ գործողություններ իրականացնելու իրավունք ունեն, միայն եթե դրանք որպես այդպիսին ճանաչված են ՄԱԿ-ի կողմից: