Սիրիական բանտին ԱՄՆ-ի գլխավորած կոալիցիայի հասցրած հարվածների արդյունքում մոտ 50 մարդ է զոհվել
Սիրիական Ալ Մայադին քաղաքի բանտին հասցված ավիահարվածների հետևանքով 42 բանտարկյալ է զոհվել. Associated Press-ի փոխանցմամբ՝ բանտում պահվել են «Իսլամական պետություն» ահաբեկչական խմբավորման գերիները:
Մեկ այլ լրատվական՝ BFMTV-ն, հղում կատարելով մարդու իրավունքների սիրիական կենտրոնին, պնդում է, որ ԱՄՆ-ի ղեկավարած միաջզգային հակաահաբեկչական կոալիցիայի ինքնաթիռները հրթիռակոծել են Ալ Մայադին քաղաքի բանտի շենքը: Դրա արդյունքում 57 մարդ է զոհվել, որոնցից 42-ը՝ բանտարկյալներ, իսկ 15-ը՝ բանտապահներ:
Ինչպես տեղեկացնում է Լենտա-ն, հունիսի 20-ին սիրիաիրաքյան սահմանի մոտակայքում՝ Սիրիայի Ալ Հասաքա նահանգի հարավ-արևելքում գտնվող բնակավայրի ռմբակոծությունների հետևանքով 12 խաղաղ բնակիչ էր զոհվել:
Ապրիլի 30-ին ամերիկյան զինվորական հրամանատարությունը խոստովանել էր, որ 2014 թվականի օգոստոսից ի վեր կոալիցիայի ինքնաթիռների հարվածների հետևանքով ավելի քան 352 խաղաղ բնակիչ է զոհվել: