Նոր համակարգչային վիրուսը հասել է Եվրոպա

Համակարգչային դրամաշորթ վիրուս Petya-ն վարակել է Էստոնիայի և Լեհաստանի համակարգիչները. այս մասին տեղեկացնում է Ռիա Նովոստի-ն:

«Էստոնիայում փակվել են Saint-Gobain ֆրանսիական կոնցերնին պատկանող Ehituse ABC շինարարական խանութների ցանցի բոլոր 11 մասնաճյուղերը»,- տեղեկացրել է ընկերության ղեկավարության անդամ Անտոն Քուսթերը:

«Այժմ մենք զբաղվում ենք այդ խնդրի լուծմամբ: Մենք տեղայնացված համակարգչային ցանցեր ունենք տվյալների պաշտպանության համար: Երբ խնդիրը լուծված լինի, մենք անմիջապես կտեղեկացնենք հաճախորդներին: Այժմ Ehituse ABC-ի բոլոր խանութները փակ են»,- Քուսթերի խոսքերը փոխանցում է էստոնական Delfi լրատվական հարթակը:

Լեհաստանում վիրուսը վարակել է սպասարկաման ոլորտի ընկերությունների ցանցերը: Հարձակման մասին տեղեկությունները հաստատել է Exatel անվտանգության ծառայությունների կառավարման բյուրոյի պետ Յակուբ Սիտան: Նրա խոսքերով՝ վնասի չափը դեռ հայտնի չէ: Երկրի վարչապետ Բեատա Շիդլոն կիբերհարձակումների հետ կապված ճգնաժամային շտաբի նիստ է հրավիրել:

«Microsoft ընկերությունը հետաքննություն է անցկացնում նոր վիրուսի տարածման հետ կապված. ընկերության աշխատակիցները պատրաստ են օգնություն ցույց տալ տուժած օգտատերերին»,- Ռիա Նովոստի-ին հայտնել է Ռուսաստանում ընկերության մամլո քարտուղար Քրիստինա Դավիդովան:

Դրամաշորթ վիրուսի հարձակումներն սկսվել են երեկ՝ հունիսի 27-ին և վարակել մի քանի երկրների ընկերությունների ՏՏ-համակարգերը՝ հիմնական հարվածը հասցնելով Ուկրաինային: Հարձակման են ենթարկվել նավթային, էներգետիկ, հեռահաղորդակցական, դեղագործական ընկերությունների, ինչպես նաև պետական մարմինների համակարգիչներ:

Group-IB ընկերությունից տեղեկացնում են, որ վիրուսն արգելափակում է համակարգիչները և 300 դոլար պահանջում բիթքոիններով: Ընկերության հաշվարկներով՝ դրամաշորթ ցանցահենների հաշվեհամարին մոտավորապես 2,7 հազար դոլար է փոխանցվել:

ESET հակավիրուսային ընկերության տվյալներով՝ հարձակումն սկսվել է Ուկրաինայից, որն էլ ամենաշատն է տուժել դրանից: Նրան հաջորդում են Իտալիան և Իսրայելը: Առաջին տասնյակում են Սերբիան, Հունգարիան, Ռումինիան, Լեհաստանը, Արգենտինան, Չեխիան և Գերմանիան. Ռուսաստանն այդ ցուցակում 14-րդն է: