Ուկրաինայի անվտանգության ծառայությունը Petya վիրուսի տարածման մեջ մեղադրում է ռուս ցանցահեններին

Ուկրաինայի անվտանգության ծառայությունը հայտարարել է, որ Ռուսաստանի հատուկ ծառայությունները կապ ունեն Petya.A  համակարգչային վիրուսի տարածման հետ, որի պատճառով տուժել են ուկրաինական մի շարք բանկեր և ընկերություններ։ Այս մասին հուլիսի 1-ին հայտարարել է ուկրաինական անվտագության ծառայության մամուլի բաժինը։

«Տվյալները, որոնք ստացվել են միջազգային հակավիրուսային ընկերությունների հետ համագործակցության արդյունքում, թույլ են տալիս մտածել, որ կիբերհարձակման հեղինակներն այն նույն ցանցահեններն են, որոնք օգտագործել են "TeleBots" և "Blackenergy" ծրագրերը Ուկրաինայի ֆինանսական, էներգետիկ և տրանսպորտային համակարգերի վրա 2016 թ․ հարձակման ժամանակ։ Սա նշանակում է, որ հարձակման հետևում կանգնած են ռուսական հատուկ ծառայությունները», - ասվում է Ուկրաինայի անվտանգության ծառայության տարածած հաղորդագրության մեջ։

Նշվում է նաև, որ հունիսի 27-ին իրականացված կիբերհարձակումը նպատակ ուներ ապակայունացնել երկրի հասարակական և քաղաքական իրավիճակը։

«Վիրուսի տարածումը նպատակ ուներ կարևոր տվյալներ ոչնչացելու միջոցով խաթարել Ուկրաինայի պետական և մասնավոր կարևորագույն ենթակառուցվածքները և այդպիսով խուճապ տարածել հասարակության մեջ», - պնդում են Ուկրաինայի հատուկ ծառայությունները։

Հիշեցնենք, որ Petya համակարգչային դրամաշորթող վիրուսն սկսել էր տարածվել հունիսի 27-ին Ուկրաինայից՝ վարակելով երկրի նավթային, էներգետիկ, հեռահաղորդակցական, դեղագործական ընկերությունների, ինչպես նաև պետական մարմինների համակարգիչներ:

Group-IB ընկերությունից տեղեկացնում են, որ վիրուսն արգելափակում է համակարգիչները և 300 դոլար պահանջում բիթքոիններով: Ընկերության հաշվարկներով՝ դրամաշորթ ցանցահենների հաշվեհամարին մոտավորապես 2,7 հազար դոլար է փոխանցվել:

Համակարգչային վիրուսից տուժել են նաև Իտալիան և Իսրայելը: Առաջին տասնյակում են Սերբիան, Հունգարիան, Ռումինիան, Լեհաստանը, Արգենտինան, Չեխիան և Գերմանիան. Ռուսաստանն այդ ցուցակում 14-րդն է: