ԱՄՆ-ն և Հարավային Կորեան հակահարված են տվել Փհենյանի հրթիռային փորձարկմանը
Ամերիկյան և հարավկորեական զինված ուժերը, ի պատասխան Հյուսիսային Կորեայի միջմայրցամաքային բալիստիկ հրթիռի փորձարկմանը, համատեղ զորավարժություններ են անցկացրել. այս մասին տեղեկացնում է «Ռոյթերս» գործակալությունը՝ հղում կատարելով ԱՄՆ-ի բանակի հայտարարությանը:
Երկու երկրների զինվորականները հրթիռներ են արձակել Հարավային Կորեայի ջրային տարածքներում: Գործի են դրվել ամերիկյան ռազմավարական հրթիռային համակարգերը (ATACMS) և հարավկորեական Hyunmoo II հրթիռները:
Ավելի վաղ Հյուսիսային Կորեայի կառավարությունը հայտարարել էր, որ հուլիսի 4-ին փորձարկված միջմայրցամաքային բալիստիկ հրթիռը հզոր միջուկային մարտագլխիկ ունի: Հս. Կորեայի առաջնորդ Կիմ Չեն Ընն իր հերթին հաստատել էր Փհենյանի մտադրությունը՝ կապված այնպիսի հրթիռի ստեղծման հետ, որով այս տարի կկարողանա հարված հասցել ԱՄՆ-ի ցամաքային տարածքին:
Վաշինգտոնի, Սեուլի և Տոկիոյի խնդրանքով՝ այսօր՝ հուլիսի 5-ին, ՄԱԿ-ի Անվտանգության խորհրդի բաց նիստ է հրավիրվելու: Նստաշրջանի ընթացքում քննարկվելու է հյուսիսկորեական հրթիռի փորձարկումը:
Հիշեցնենք, որ հուլիսի 4-ին Հյուսիսային Կորեայի իշխանությունները տեղեկացրել էին նոր միջմայրցամաքային բալիստիկ հրթիռի հաջող փորձարկման մասին: Փհենյանի տվյալների համաձայն՝ նախկինում չփորձարկված «Հվասոն-14» հրթիռի թռիչքի հեռավորությունը 933 կմ է եղել, բարձրությունը՝ 2802 կմ, այն ճշգրիտ խոցել է թիրախը մեկնարկից 39 րոպե հետո: