Ուկրաինայում կանխվել է Petya վիրուսի հարձակման երկրորդ ալիքը
Ուկրաինայի իրավապահ մարմինները կանգնեցրել են երկրում նախորդ շաբաթ կառավարության, խոշոր բանկերի և տրանսպորտային ընկերությունների աշխատանքը կաթվածահար արած Petya համակարգչային վիրուսի տարածման երկրորդ ալիքը։ Այս մասին այսօր՝ հուլիսի 5-ին, տեղեկացրել է Ուկրաինայի ներքին գործերի նախարար Արսեն Ավակովը:
«Կիբերոստիկանության բաժանմունքի հատուկ գործակալները Ուկրաինայի Անվտանգության ծառայության և դատախազության հետ համատեղ դադարեցրել են Petya կիբերհարձակման երկրորդ փուլը: Հարձակման գլխավոր ժամը տեղի ժամանակով 16:00-ն էր: Այս սկսվել էր 13:40-ին, իսկ մինչև 15:00 կիբերոստիկանությունն արգելափակել էր հղումը և վիրուսի ակտիվացումը M.E.DOC տեղեկատվական համակարգի սերվերներից»,- ֆեյսբուքյան իր էջում գրել է նախարարը:
ՏԱՍՍ-ի տեղեկացմամբ՝ հուլիսի 4-ին Ուկրաինայի ոստիկանությունն առգրավել է M.E.DOC ուկրաինական ընկերության սարքավորումները, որն զբազվում է երկրում հարկային վարչարարության համար ամենահայտնի ծրագրի մշակմամբ: Ուկրաինայի ՆԳՆ-ի կիբերոստիկանության բաժանմունքի ղեկավար Սերգեյ Դեմեդյուկի փոխանցմամբ՝ քննչական գործողությունները կապված են եղել առաջին կիբերհարձակման հետ: Քննիչները կարծում են, որ վիրուսի տարածման սկզբնաղբյուրն ընկերության ուղարկած թարմացումներն են եղել: Մինչդեռ M.E.DOC-ի ներկայացուցիչները հայտարարել են, որ իրենց սերվերները ցանցահենների կողմից հարձակման չեն ենթարկվել և տարածված թարմացումները վիրուսներ չեն պարունակել:
Հիշեցնենք, որ հունիսի 27-ին համաշխարհային հաքերային հարձակում է իրականացվել՝ Petya դրամաշորթ վիրուսի օգտագործմամբ: Մասնագետների գնահատմամբ՝ վիրուսը հարձակում է գործել մոտ 80 ընկերությունների վրա, որոնց մեծ մասը՝ ուկրաիական: Ռուսաստանում հարձակման են ենթարկվել «Ռոսնեֆտ», «Բաշնեֆտ», «Mars», «Nivea» և «Mondelez International» ընկերությունները: Վիրուսն արգելափակում է օպերացիոն համակարգի մեկնարկը, իսկ աշխատանքի վերսկսման և ֆայլերի գաղտնազերծման համար 300 դոլար է պահանջում բիթքոիններով: