Թրամփն անհամբերությամբ սպասում է անգլո-ամերիկյան առևտային պայմանագրի հաստատմանը
ԱՄՆ-ի նախագահ Դոնալդ Թրամփն ակնկալում է, որ Մեծ Բրիտանիայի հետ «հզոր» առևտրային գործարքը «շատ արագ» իրականություն կդառնա. գրում է BBC-ն:
Մեծ Բրիտանիայի վարչապետի հետ հանդիպմանն ընդառաջ Թրամփը հայտարարել էր, որ նա «յուրահատուկ հարաբերություներ» ունի Մեյի հետ: «Չկա որևէ երկիր, որ մեր երկրներից ավելի ջերմ հարաբերություններ ունենա»,- լրագրողներին ասել է ԱՄՆ-ի նախագահը:
«Մենք աշխատում ենք առևտրային գործարքի ուղղությամբ, որը շատ մեծ և շատ հզոր գործարք է լինելու երկու երկրների համար և ես կարծում եմ, որ դա շատ արագ կարվի»,- ընդգծել է Թրամփը:
Միացյալ թագավորության ԱԳ նախարարի նախկին տեղակալ Սայմոն Ֆրեյզերը կարծում է, որ գործարքը մոտ ապագայում կնքվի: «Բանն այն է, որ մենք չենք կարող բանակցել ԱՄՆ-ի կամ մեկ ուրիշի հետ, քանի դեռ դուրս չենք եկել Եվրամիությունից: Նրանք նույնպես չեն բանակցի մեզ հետ, մինչև ԵՄ-ի հետ մեր հարաբերությունները պարզ չլինեն, քանի որ մեր ունեցած մուտքը դեպի Եվրոպա շատ կարևոր առավելություն է մեզ հետ բանակցություններ սկսելու համար»,- ասել է նա:
Թրամփի հետ տետատետ հանդիպման ժամանակ Մեյը, ենթադրաբար, փորձել է համոզել նրան վերանայել Փարիզյան համաձայնագրից դուրս գալու որոշումը: «Ես կանեմ դա. ես կշարունակեմ պնդել, որ Միացյալ Թագավորությունը հավատում է Փարիզյան համաձայնագրին»,- ասել է Մեյը:
BBC-ի՝ քաղաքական թեմաներով գլխավոր խմբագրի տեղակալ Ջոն Պինեարի խոսքերով՝ Թրամփը քաղաքավարի կերպով կլսի նրան, սակայն առաջխաղացման սպասել հարկավոր չէ:
G20-ի գագաթնաժողովի շրջանակներում Թրամփի հետ հանդիպելուց և «հետբրեզքիթային» առևտրային գործարքի մասին խոսելուց հետո Թերեզա Մեյը հանդիպում է ունեցել նաև Ճապոնիայի վարչապես Շինձո Աբեի հետ:
Ճապոնիայի կառավարության ղեկավարի հետ հանդիպման ժամանակ հիմնական շեշտը դրվել է առևտրային պայմանագրի, ինչպես նաև 2019 թ. Ռեգբիի աշխարհի գավաթի և 2020 թ. Օլիմպիական խաղերին ընդառաջ Ճապոնիային ահաբեկչության և կիբերհանցագործության դեմ պայքարում օգնություն առաջարկելու վրա:
Մեյն առանձնազրույց է ունեցել նաև Թուրքիայի նախագահ Ռեջեփ Թայիփ Էրդողանի հետ՝ Սիրիայի սահմաններից դուրս եկող Իսլամական պետության ահաբեկիչների աճող թվի դեմ պայքարի միջոցները քննարկելու համար:
Ինչպես նշում է BBC-ն, Մեծ Բրիտանիայի խոհրդարանական ընտրություններից հետո «Մեծ քսանյակի» գագաթնաժողովը աշխարհի առաջնորդների առաջին հանդիպումն էր: Թեև որոշ վերլուծաբանների կարծիքով՝ ընտրության արդյունքները թուլացրին Մեյի դիրքերը, վերջինս պնդում է, որ չի պատրաստվում նահանջել և շարունակելու է առաջնորդել երկիրը միջազգային հարթակներում: