Թիլերսոնը վերադառնում է Կատար էմիրի հետ հանդիպելու համար

Սաուդյան Արաբիայի և Դոհայի հետ լարված հարաբերություններ ունեցող մյուս արաբական երկրների առաջնորդների հետ քննարկումներն ավարտելուց հետո ԱՄՆ-ի արտաքին քաղաքական գերատեսչության ղեկավար Ռեքս Թիլերսոնը վերադարձել է Կատար՝ 37-ամյա էմիրի հետ բանակցություններ անցկացնելու համար. գրում է abc News-ը:

ԱՄՆ-ի պետքարտուղարի ճամփորդությունները դեռևս ոչ մի առաջընթաց չեն գրանցել Պարսից ծոցի երկրների միջև աճող լարվածության հարցում:

Քուվեյթ կատարած այցից հետո Թիլերսոնը քննարկումներ է ունեցել Կատարի էմիր Շեյխ Թամիմ բին Համադ Ալ Թանիի հետ, որի արդյունքում հակաահաբեկչական դաշնագիր է ստորագրվել:

Հիշեցնենք, որ հունիսի սկզբին Սաուդյան Արաբիան, ԱՄԷ-ն, Եգիպտոսը և Բահրեյնը խզեցին Կատարի հետ օդային, ջրային և ցամաքային կապերը՝ նրան մեղադրելով ծայրահեղականներին աջակցելու մեջ: Մինչև այժմ քառյակը չի նշել, որ պատրաստ է հրաժարվել իր ծանրակշիռ որոշումից: Սաուդյան Արաբիա ժամանելուց մի քանի ժամ առաջ նրանք նշել են, որ հակաահաբեկչական դաշնագիրը «բավարար չէ» սահմանափակումները մեղմացնելու համար:

Սաուդյան Արաբիայում ԱՄՆ-ի պետքարտուղարը հանդիպել է թագավոր Սալմանի և նրա թագաժառանգ Մոհամեդ բին Սալմանի, ինչպես նաև քառյակի արտգործնախարարների հետ: Նրանց բանակցությունները դեռևս պաշտոնապես չեն մեկնաբանվել, սակայն հավանական է, որ Թիլերսոնը ճնշել է նրանց՝ Կատարին ներկայացված պահանջներից մի քանիսը մեղմացնելու համար:

Նշենք, որ հունիսի վերջին չորս երկրները Կատարին 13 պահանջ էին ներկայացրել՝ հարաբերությունները վերսկսելու համար, որոնք, սակայն, չէին ընդունվել Դոհայի կողմից:

«Մենք հաստատում ենք, որ ձեռնարկված միջոցառումները հիմնավորված են Կատարի իշխանությունների կողմից ահաբեկիչներին աջակցելու, ֆինանսավորելու և թաքցնելու շարունակական և բազմաբնույթ գործունեությամբ, ինչպես նաև հարևան երկրների ներքին գործերին միջամտելով և թշնամական, ծայրահեղական հռետորաբություն տարածելով»,- համատեղ մամլո ասուլիս ընթքացքում հայտարարել են չորս երկրների ներկայացուցիչները:

«Սաուդյան Արաբիայի հետ բանակցությունները դժվար են ընթացել, քանի որ ի սկզբանե Թիլերսոնը Կատարի կողմից էր: Նա պետք է գիտակցի, որ ավելի է բարդացնում արդեն իսկ դժվարին ճգնաժամը»,- ասել է «Ալ Արաբիա» հեռուստաալիքի գլխավոր տնօրեն Աբդուլրահման ալ Ռաշիդը: