Խորհրդարանական ընտրություններից հետո Ավստրիան կառաջնորդի Արևելյան Եվրոպային՝ ընդդեմ Բեռլինի

Աշնանն Ավստրիայում կայանալիք խորհրդարանական ընտրությունների արդյունքները կարող են արմատական փոփոխություն մտցնել եվրոպական քաղաքականության մեջ: Երկրի բոլոր առաջատար քաղաքական ուժերը դեմ են փախստականների ընդունմանը և կողմ՝ Գերմանիայի ու Անգելա Մերկելի հետ հարաբերությունների սառեցմանը: Հատկապես հավակնոտ պլաններ ունի գործող արտգործնախարար Սեբաստիան Կուրցը: Նրա ղեկավարած Ազգային կուսակցության հաղթանակի դեպքում Վիեննան կմտերմանա Բուդապեշտի, Պրահայի, Բրատիսլավայի և Վարշավայի հետ: Կենտրոնաեվրոպական դաշինքը կարող է Վիեննային դարձնել Եվրոպայի իշխող քաղաքական կենտրոններից մեկը. գրում է Ռիա Նովոստի-ն:

Նշենք, որ երկու հիմնական տնտեսական գործընկերները՝ Ավստրիան և Գերմանիան, մտերիմ դաշնակիցներ էին մինչև 2016 թ. սկիզբը: Ավստրայի կանցլեր Վերներ Ֆայմանը կանգնել էր միգրացիոն ճգնաժամի առաջ՝ հաստատելով ավելի քան մեկ միլիոն մերձարևելյան ներգաղթյալների ընդունման ծրագիրը: Նրանցից տասնյակ հազարավորները հանգրվան գտան Ավստրայում, իսկ մյուները՝ Շվեդիայում:

Հասարակական կարծիքի ճնշման տակ Ֆայմանը հայտարարեց արտաքին քաղաքականության կտրուկ փոփոխության մասին՝ ընդունելով «միգրացիոն արտակարգ դրություն»: Այդ պահից սկսած Վիեննան հրաժարվել է նոր փախստականներ ընդունելուց և փորձել մտերմանալ Արևելյան Եվրոպայի երկրների հետ, որոնց միջոցով՝ այսպես կոչված «բալկանյան ճանապարհով», 2015-2016 թ․թ. ներգաղթյալներն անցել են Եվրոպա:

Արևելյան Եվրոպայի երկրների հետ համագործակցությունը Ավստրայի պատմական անցյալի մասն է, որը դեռևս 99 տարի առաջ իր կազմում ներառում էր հունգարական, չեխական, սլովակական, խորվաթական և լեհական հողեր: Նախկին սոցիալիստական երկրների՝ Եվրամիություն մուտք գործելուց հետո Ավստրիայի հետ առևտրաշրջանառությունը կայուն կերպով աճել է:

Տասնյակ հազարավոր սիրիացի փախստականներ ընդունած և իր դիրքորոշումը փոխած Ավստրայի վիճակը բացառիկ է: Մինչ միգրացիոն ծրագրից հրաժարված Լեհաստանը և Հունգարիան կարող են պատժամիջոցների ենթարկվել ԵՄ-ի կողմից, Ավստրիային դա չի սպառնում: «Մենք կատարել ենք բոլոր պարտավորությունները և Բրյուսելից մեղմացում ենք ակնկալում»,- ասել է Ավստրայի ներկայիս կանցլեր Քրիստիան Քերնը:

Գերմանիայում արդեն սպասում են ամենամտերիմ հարևանի շրջադարձին դեպի Արևելյան Եվրոպա և զգուշությամբ են պատրաստվում դրան: Գերմանական Die Welt թերթի լրագրողների վերլուծության համաձայն՝ եթե ընտրությունների ֆավորիտը՝ Կուրցը, հաղթանակ տանի, նա կարող է ոգեշնչել իր երկրին դաշինք կազմել Անգելա Մերկելի դեմ: