«Դոկտոր վեբ» ընկերությունը կոչ է անում զգուշանալ հանրային ծառայությունների կայքում հայտնված վնասակար կոդից
«Դոկտոր վեբ» հակավիրուսային ծրագրերի մշակման ընկերությունը Ռուսաստանի հանրային ծառայությունների հարթակում պոտենցիալ վնասակար կոդ է հայտնաբերել. այս մասին ասվում է ընկերության կայքում:
Gosuslugi.ru կայքում անհայտ անձանց կողմից ներմուծված կոդն օգտատիրոջ բրաուզերին ստիպում է կապվել դոմեյնի հասցեներից մեկի հետ, որը գրանցված է անհայտ անձի անվան տակ: «Դոկտոր վեբ»-ի մասնագետները գտել են ավելի քան 15 այդպիսի հասցե: Դրանց սեփականտերերը կարող են ցանկացած պահի վնասակար կոդ տեղադրել, որով կկարողանան վարակել կայքի այցելուի համակարգիչը կամ էլ գողանալ նրանց անձնական տվյալները:
Ռիա Նովոստի-ն տեղեկացնում է, որ այս տեղեկատվությունը փոխանցվել է կայքի տեխնիկական աջակցության ծառայություն: «Դոկտոր վեբ»-ը հարթակի օգտատերերին խորհուրդ է տվել զգուշություն ցուցաբերել:
«Կասպերսկու լաբարատորիա»-ում նշել են, որ հանրային ծառայությունների հարթակում հայտնաբերված վիրուսը 2015 թ.-ից գովազդների տեսքով հայտնվել է համացանցում: Ընկերության մամլո ծառայությունում հայտնել են, որ կոդը «նոր կայքերի հղումներ է բացում, որոնք օգտատերը չի տեսնում»:
Կապի և տրանսպորտի նախարարությունում Ռիա Նովստի-ին տեղեկացրել են, որ պոտենցիալ սպառնալիքն աննշան է և այն կվերացվի մոտ ժամանակներս: «Օգտատերերի համար ոչ մի բացասական հետևանք չի ակնկալվում»,- հայտարարել են նախարարությունում:
«Ռոստելեկոմ»-ում ընդգծել են, որ հարթակի օգտատերերի շահերը չեն տուժի: Նրանք կիբերանվտանգության հարթակի ստուգումներ են իրականացնում՝ հետագայում նման միջադեպերը կանխելու համար: