Իսրայելում ամերիկյան դեսպանատան տեղափոխումը Երուսաղեմ ժամանակի հարց է․ ԱՄՆ փոխնախագահ

Իսրայելում ԱՄՆ-ի դեսպանատան՝ Թել Ավիվից Երուսաղեմ տեղափոխելն ընդամենը ժամանակի հարց է։ Այս մասին Վաշինգտոնում տված հարցազրույցի ժամանակ հայտարարել է ԱՄՆ-ի փոխնախագահ Մայք Փենսը։

Փենսի խոսքով՝ Թրամփն «անձամբ պարտավորվածություն է զգում օժանդակելու իսրայելապաղեստինյան բազմամյա հակամարտության լուծմանը»։ Նրա խոսքով ԱՄՆ-ի առաջնորդը ոչ միայն անձամբ է ացելում տարածաշրջան, այլ նաև իր օգնականներին և խորհրդականներին է ուղարկում այնտեղ՝ «խաղաղության ուղիներ փնտրելու»։

«Ուզում եմ հավաստիացնել, որ մեր նախագահը գիտի, որ խաղաղության հաստատումը պահանջում է ատելության յուրաքանչյուր դրսևորման բացառում։ Իսկ ամենակարևորը՝ պաղեստինցիները պետք է ամբողջապես ճանաչեն և ընդունեն հրեական պետությունը՝ Իսրայելը։, - ասել է Փենսը։

Նրա խոսքով՝ Մերձավոր Արևելքում հակամարտությունների լուծման համար անհրաժեշտ է, որ երկու կողմերն էլ գնան փոխզիջման։ «Թույլ տվեք նշել, սակայն, որ Դոնալդ Թրամփը երբեք չի գնա այնպիսի փոխզիջման որը կարող է սպառնալ Իսրայելի անվտանգությանը», - շարունակել է Փենսը։

1995 թ․ ԱՄՆ-ում ընդունվել է մի օրենք, ըստ որի, Իսրայելի մայրաքաղաք պետք է ճանաչվի Երուսաղեմը։ Փաստաթղթի համաձայն՝ ԱՄՆ-ի նախագահը պարտավորվում էր մինչև 1999 թ․ մայիսի 31-ը ամերիկյան դեսպանատունը Թել Ավիվից տեղափոխել Երուսաղեմ։ Սակայն, փորձելով խուսափել այնպիսի քայլերից, որոնք կարող էին տարածաշրջանում սրել իրավիճակը, ԱՄՆ-ի առաջորդները մշտապես հետաձգում են նշված պահանջի կատարումը։