Թրամփը որոշել է դադարեցնել սիրիական ընդդիմությանը զինելու ԿՀՎ-ի ծրագիրը. WP

ԱՄՆ-ի նախագահ Դոնալդ Թրամփը որոշել է դադարեցնել Կենտրոնական հետախուզական վարչության (ԿՀՎ) կողմից՝ կառավարական զորքերի դեմ կռվող այսպես կոչված սիրիական չափավոր ընդդիմությանն աջակցելու և զինամթերք տրամադրելու ծրագիրը. այս մասին տեղեկացնում է The Washington Post-ը՝ հղում կատարելով ամերիկյան վարչակազմում եղած աղբյուրներին:

Խմբագրությունը ենթադրում է, որ սա կարող է փաստացի քայլ լինել Ռուսաստանին ընդառաջ, որն աջակցում է Սիրիայի գործող իշխանությանը: Աղբյուրների համաձայն՝ Թրամփն այս որոշումն ընդունել է մոտ մեկ ամիս առաջ՝ վարչության պետ Մայք Պոմպեոյի և ազգային անվտանգության հարցերով իր օգնական գեներալ Հերբերթ Մաքմասթերի հետ հանդիպումից հետո՝ Համբուրգում Վլադիմիր Պուտինի հետ բանակցությունների նախօրեին:

Թերթը պարզաբանում է, որ Բաշար Ասադի դեմ հանդես եկող ապստամբների աջակցության ծրագրի կասեցումը Սիրիայի հարավարմուտքում հրադադարի մասին համաձայնագրի կնքման նախապայմաններից չի եղել:

WP-ի այլ աղբյուրների տվյալների համաձայն՝ Թրամփի որոշումն աջակցություն է ստացել Հորդանանի կողմից, որի տարածքում էլ իրականացվում է զինյալների որոշ ջոկատների պատրաստումը: Ինչպես նշվում է, այս քայլը ներկայիս վարչակազմի առավել հիմնավոր ռազմավարության մասն է կազմում, որն ուղղված է Ռուսաստանի հետ Սիրիայում հրադարարի հաստատման համաձայնագրի կնքմանը:

«Սա շատ կարևոր որոշում է: Պուտինը հաղթեց Սիրիայում»,- գաղտնիության պայմանով թերթին հայտնել է ներկայիս վարչակազմի ներկայացուցիչը:

Ընդդիմության ջոկատներին ԿՀՎ-ի աջակցության ծրագիրը, որը մեկնարկել 2013 թ., Բարաք Օբամայի վարչակազմի կողմից Ասադին ճնշելու քաղաքականության առանցքն էր, սակայն, ինչպես նշում է խմբագրությունը, «անգամ դրա կողմնակիցներն սկսեցին թերահավատորեն մոտենալ դրա արյունավետությանը, երբ Ռուսաստանն իր զորքերը Սիրիա ուղարկեց»:

Միևնույն ժամանակ, մի շարք փորձագետներ մտավախություն են հայտնել, որ ԿՀՎ-ի ծրագրի կասեցումը կարող է ձեռնտու լինել ծայրահեղականներին և վնասել ԱՄՆ-ի հեղինակությանը: