Հզոր երկրաշարժ՝ Էգեյան ծովի թուրքական և հունական ափերին․ կան զոհեր

Հզոր երկրաշարժ է տեղի ունեցել Էգեյան ծովի թուրքական ափերի մոտ։ Երկրաշարժից հիմնական վնասը կրել է թուրքական Բոդրում առողջարանային քաղաքը և հունական Կոս կղզին։ Ստորգետնյա ցնցման ուժգնությունն էպիկենտրոնում կազմել է 9 բալ։

Թուրքական աղբյուրները նշում են, որ 6,7 մագնիտուդ հզորության երկրաշարժի էպիկոնտրոնը գտնվում է Բոդրումից 10,3, իսկ Կոսից՝ 16,2 կիլոմետր հեռավորության վրա։ Ցնցման օջախը եղել է 10 կմ խորության վրա։  

Հիմնական ցնցմանը հետևել են մի քանի հետցնցումներ, որոնցից ամենաուժեղը՝ 5,1 մագնիտուդ հզորության։ Եվրոպայի միջերկրածովյան սեյսմոլոգիաան կենտրոնը նույնպես հայտնել է Էգեյան ծովում տեղի ունեցած երկրաշարժի մասին։

Նախնական տվյալներով՝ Կոս կղզում զոհվել է երկու մարդ, վիրավորվել՝ 120-ը։ Թուրքական Բոդրումում վիրավորների թիվը հասել է 70-ի։