Ինտերպոլը տարածել է ԻՊ-ի 173 մահապարտ զինյալների անուններով ցուցակ. The Guardian
Ինտերպոլը տարածել է Իսլամական պետության 173 մահապարտ ահաբեկիչների ցուցակ, որոնք վերապատրաստվել են Մերձավոր Արևելքում տարած պարտությունների պատճառով Եվրոպայից վրեժ լուծելու համար. գրում է The Guardian-ը:
Համաշխարհային հանցավորության դեմ պայքարող գործակալության ցանկը կազմվել է ԱՄՆ-ի հետախուզության կողմից Սիրիայում և Իրաքում ԻՊ-ի տարածքների վրա կատարած հարձակումների ժամանակ ստացված տեղեկության հիման վրա:
Եվրոպական հակաահաբեկչական ծառայություններն անհանգստացած են, որ Իսլամական պետության «խալիֆայության» փլուզման պատճառով մահապարտ ահաբեկիչները կարող են գալ Եվրոպա և ավարտին հասցնել իրենց «առաքելությունը»:
Դեռևս պարզ չէ՝ արդյո՞ք The Guardian-ի ձեռք բերած ցուցակում առկա մարդիկ մուտք գործել են Եվրոպա, թե ոչ, սակայն Ինտերպոլի գործակալներն ընդգծում են, որ Եվրոպային լուրջ մարտահրավեր է սպասվում:
Իտալիայի կողմից Ինտերպոլի ցուցակին կցված գրառման մեջ բացատրվում է, թե ինչ կառուցվածք ունի ահաբեկիչների տվյալների բազան՝ հավաքելով հարյուրավոր մասերից բաղկացած հանելուկի տարրերը, որոնց հիմնական մասը ստացվել է ԻՊ-ի տեղական գրասենյակների գրավման ժամանակ:
Ինչպես նշում է The Guardian-ը, ցուցակում ներառված են կասկածյալների անունները, ԻՊ-ին հավաքագրվելու ամսաթիվը, նրանց վերջին բնակության վայրը, մզկիթը, որտեղ կատարել են աղոթքները, նրանց մայրերի անունները և որոշ լուսանկարներ:
Գրոհայիններից յուրաքանչյուրի համար ինքնությունը հաստատող նիշ է ստեղծվել, որպեսզի Ինտերպոլի անդամ երկրները կարողանան տվյալներ մուտքագրել տեղական տվյալների բազայում: Ապա այդ տեղեկությունները կներառվեն Ինտերպոլի ավտոմատ որոնման ծառայությունում՝ նրանց անուններն ուժեղացված հսկողության ցուցակում ավելացնելու համար:
Ամերիկյան հետախուզությունը համոզված է ցուցակի աղբյուրների իսկության մեջ, սակայն արևմտյան հակաահաբեկչական կազմակերպությունները հայտնել են, որ մեծ դժվարությունների առաջ են կանգնում կասկածյալներին գտնելու համար, որոնք մի շարք կեղծ փաստաթղթեր և անձնագրեր ունեն:
Եվրոպական հակաահաբեկչական ծառայության գործակալները նշել են, որ այդ ցանկը Եվրոպայում տարածելու նպատակներից մեկը ահաբեկիչների շարքերում Եվրոպայում ծնվածներին հայտնաբերելն է: 2015 թ. ՄԱԿ-ի տվյալներով՝ Իրաքի և Սիրիայի ահաբեկիչներից 20 հազարն օտարերկրացիներ են, որոնցից չորս հազարը՝ Եվրոպայից:
The Guardian-ի փոխանցմամբ՝ ԻՊ-ի ահաբեկիչների՝ Եվրոպա հասնելու արագությունը կախված է, թե արդյո՞ք խմբավորումը պատրաստվում է նոր բազաներ հիմնել Սիրիայում: Կարծիք կա, որ զինյալները Ռաքքայից անցում կկատարեն հարավ՝ Դեր Զորից մինչև Աբու Քամալ ընկած տարածքը:
Ջիհադիստական խմբավորումը ներկայումս պայքարում է Իրաքի հյուսիսային Մոսուլ քաղաքի նկատմամբ վերահսկողությունը վերականգնելու համար:
Երեկ՝ հուլիսի 21-ին, ամերիկյան բանակի գնդապետ Ռայան Դիլոնը տեղեկացրել է, որ Ռաքքայում մոտ երկու հազար զինյալ կա․ վերջիններս խաղաղ բնակչությանն օգտագործում են որպես կենդանի վահան: