Քաբուլում տեղի ունեցած պայթյունը 24 մարդու կյանք է խլել

Ավելի քան 24 մարդ է զոհվել Աֆղանստանի մայրաքաղաք Քաբուլում տեղի ունեցած պայթյունի հետևանքով։ Այս մասին հայտնում է «Ֆրանս Պրես» լրատվական գործակալությունը՝ հղում կատարելով Աֆղանստանի ներքին գործերի նախարարության տվյալներին։

Նախնական տվյալների համաձայն՝ տեղի ունեցածի հետևանքով վիրավորվել է 42 մարդ։ Ավելի վաղ հաղորդվում էր քսան զոհի մասին։ Նշվում է, որ ահաբեկիչները նպատակ են ունեցել պայթեցնել նավթի և լեռնահանքային արդյունաբերության նախարարության աշխատակիցներին տեղափոխող ավտոբուսը։

Associated Press-ի փոխանցմամբ՝ բոլոր զոհվածները խաղաղ բնակիչներ են եղել։

Հատկանշական է, որ պայթյունը տեղի է ունեցել Աֆղանստանի փոխվարչապետ Հաջի Մոհամադ Մոհակիկի տնից ոչ հեռու։

Ահաբեկչության պատասխանատվությունն ստանձնել է «Թալիբան» ծայրահեղական շարժումը։