ԵՄ-ն կարող է պատասխան քայլեր ձեռնարկել ԱՄՆ-ի հակառուսական պատժամիջոցների դեմ․ Financial Times
Եվրահանձնաժողովի ղեկավար Ժան Կլոդ Յունկերը կոչ է արել Բրյուսելի կողմից անհապաղ պատասխան քայլեր ձեռնարկել, եթե եվրոպական ընկերությունները տուժեն ԱՄՆ-ի հակառուսական պատժամիջոցներից. այս մասին տեղեկացրել է Financial Times-ը՝ հղում կատարելով հուլիսի 26-ին Եվրահանձնաժողովի նիստի համար նախատեսված փաստաթղթին:
Այնտեղ նշվում է, որ Բրյուսելը «պետք է պատրաստ լինի գործել առաջիկա մի քանի օրերի ընթացքում», եթե ԱՄՆ-ն միջոցներ ձեռնարկի՝ «առանց Եվրամիության անհանգստությունները հաշվի առնելու»:
ՏԱՍՍ-ի փոխանցմամբ՝ փաստաթուղթը նախատեսում է ԱՄՆ-ի նախագահ Դոնալդ Թրամփից «հրապարակային կամ գրավոր հավաստիացում» ստանալ, որ Վաշինգտոնը չի սահմանի այնպիսի պատժամիջոցներ, որոնք կվնասեն ԵՄ-ի շահերին:
Փաստաթղթի համաձայն՝ Բրյուսելի կողմից առաջարկվող մյուս ենթադրյալ քայլերն են «եվրոպական իրավունքի օգտագործումը՝ ԱՄՆ-ի քայլերը Եվրոպայում չճանաչելու և չիրականացնելու նպատակով», ինչպես նաև «Առևտրի համաշխարհային կազմակերպության հետ համատեղ պատասխան միջոցառումների» պատրաստումը:
Ինչպես նշում է թերթը, այս քայլերն արտացոլում են Բրյուսելի այն մտահոգությունը, թե Վաշինգտոնի կողմից սահմանված պատժամիջոցները «կարող են հարված հասցնել Ռուսաստանի հետ կապված ծրագրերին, ինչպես օրինակ՝ «Հյուսիսային հոսք-2»-ին մասնակցող եվրոպական էներգետիկ ընկերություններին»: Եվրամիության իշխանությունները պատրաստվում են ապացուցել, որ ամերիկյան պատժամիջոցների պոտենցիալ հետևանքը Եվրոպայի համար չի սահմանափակվի մեկ ծրագրի խափանմամբ. հարվածի տակ կարող են դրվել Ռուսաստանում եղած գազատար խողովակների շահագործումը և արդիականացումը, որոնցով վառելիք է մատակարարվում Ուկրաինային, ինչպես նաև Կասպյան տարածաշրջանում խողովակաշարերի կառուցման և Եգիպտոսի ափերին գտնվող գազի հանքվայրերի յուրացման ծրագրերը:
Փաստաթղթում ընդգծվում է, որ պատժամիջոցները կարող են բացասական ազդեցություն ունենալ նաև այն երկրների վրա, որոնք ԵՄ-ի պատժամիջոցների ազդեցության տակ օրինական հիմունքներով համագործակցում են ռուսական կողմի հետ երկաթուղային, ֆինանսական, նավաշինական և լեռնահանքային արդյունաբերության ոլորտներում: