Կատարի հետ դիվանագիտական հարաբերությունները սառեցրած երկրներն ընդլայնել են «ահաբեկչական ցուցակը»

Սաուդյան Արաբիան, ԱՄԷ-ն, Բահրեյնը և Եգիպտոսը ընդալայնել են «ահաբեկչական ցուցակը»՝ ավելացնելով իբրև թե Կատարի իշխանությունների հետ կապ ունեցող ինը ֆիզիկական անձանց և կազմակերպությունների. Այս մասին տեղեկացրել է Սաուդյան Արաբիայի պետական լրատվական գործակաույունը:

Սև ցուցակում ներառված 59 անձինք և 12 կառույցները «քառյակի» կողմից մեղադրվում են ահաբեկչական խմբավորումներին աջակցելու մեջ. այդ ցուցակը հրապարակվել է կատարական ճգնաժամի սկզբում: Դոհայում բազմիցս հայտարարել են, որ այդ ցանկը ոչ մի հիմք չի ներկայացնում և կապ չունի Կատարի հետ:

ՏԱՍՍ-ի փոխանցմամբ՝ սև ցուցակում են հայտնվել Եմենում հիմնադրված երեք և Լիբիայում հիմնադրված վեց կազմակերպություններ, Կատարի երեք, Քուվեյթի մեկ, Եմենի երեք և Լիբիայի երկու քաղաքացիներ: Արաբական երկրների պնդմամբ՝ այդ անձինք և կազմակերպությունները մեղադրվում են «Ալ Քաիդա» ահաբեկչական խմբավորման սիրիական ճյուղին՝ «Ջեբհաթ ալ Նուսրա» խմբավորմանն աջակցելու մեջ:

Հիշեցնենք, որ հունիսի 5-ին չորս արաբական երկրները խզեցին դիվանագիտական կապերը Կատարի հետ՝ նրան մեղադրելով իրենց ներքին գործերին միջամտելու և ահաբեկչությանն աջակցելու մեջ. դրան հաջորդեցին տնտեսական սահմանափակումները և էմիրության տրանսպորտային շրջափակումը: Ավելի ուշ «քառյակը» 13 պահանջից բաղկացած ցուցակ ներկայացրեց Կատարին, որը մեկ ամիս անց կրճատվեց յոթով: Այժմ միայն այդ սկզբունքների իրականցման դեպքում հնարավոր կլինի լուծել կատարական ճգնաժամը:

Հուլիսի 11-ին Դոհայում ԱՄՆ-ի պետքարտուղար Ռեքս Թիլերսոնը երկկողմ հուշագիր էր ստորագրել ահաբեկչության ֆինանսավորման հակազդեցության փոխըմբռնման վերաբերյալ: Արաբական երկրներն այդ քայլը բավարար չեն համարել՝ կոչ անելով երաշխավորել Դոհայի կողմից պարտավորությունների իրականացումը: Հուլիսի 20-ին Կատարի էմիրը հակաահաբեկչական օրենքի վերանայման մասին հրաման էր տվել, որը ՄԱԿ-ում դիտվել էր որպես դրական քայլ: Հակամարտության սկզբում արած հայտարարության մեջ շեյխ Թամիմը հերքել է ահաբեկչության աջակցության մեղադրանքները և ընդգծել, որ Դոհան բոլոր հնարավոր միջոցներով պայքարում է դրա դեմ: