Թրամփը մեղադրել է WP-ին ԿՀՎ-ի կողմից սիրիական ընդդիմության աջակցության ծրագրի դադարեցման մասին կեղծ լուրեր տարածելու համար
ԱՄՆ նախագահ Դոնալդ Թրամփը հայտարարել է, որ The Washington Post թերթը կեղծ նորություններ է հրապարակել Կենտրոնական հետախուզական վարչության կողմից սիրիական չափավոր ընդդիմությանը տրամադրվող օգնության ծրագրի կասեցման մասին. նախագահն այսպիսի հայտարարություն է արել թվիթերյան իր էջում:
«The Washington Post-ը շինծու փաստեր է հրապարակել Ասադի վարչակարգի դեմ պայքարող սիրիական ապստամբներին տրվող իմ մեծ, վտանգավոր և շռայլ փոխանցումների մասին: The Washington Post-ում եղած ինձ վերաբերող բոլոր նյութերը կեղծ են: Դրանք նույնքան ահավոր են, որքան CNN-ի վարկանիշները»,- ասել է Թրամփը:
Նշենք, որ հուլիսի 19-ին The Washington Post-ը, հղում կատարելով ամերիկյան վարչակազմի աղբյուրներին, հաղորդել է, որ Դոնալդ Թրամփը որոշել է դադարեցնել ԿՀՎ-ի կողմից սիրիական, այսպես կոչված, չափավոր ընդդիմությանը տրամադրվող աջակցության ծրագիրը:
Թերթի տվյալների համաձայն՝ Թրամփն այդ որոշումն ընդունել է ԿՀՎ-ի պետ Մայքլ Պոմպեոյի և ազգային անվտանգության հարցերով օգնական գեներալ Հերբերտ Մաքմասթերի հետ հանդիպումից հետո՝ G20-ի գաղաթնաժողովի շրջանակներում Վլադիմիր Պուտինի հետ քննարկումների նախօրեին:
Ինչպես նշում է ՏԱՍՍ-ը, ԿՀՎ-ի կողմից ընդդիմադիր ջոկատների աջակցության ծրագիրը, որը մեկնարկել է 2013 թ., Սիրիայի նախագահ Բաշար Ասադի վրա ճնշում գործադրելու Բարաք Օբամայի քաղաքականության հիմքն էր: Ընդ որում, թերթի փոխանցմամբ՝ «անգամ դրա կողմնակիցները սկսեցին կասկածի տակ դնել դրա արդյունավետությունը, երբ մեկ տարի առաջ Ռուսաստանը զորքեր ուղարկեց Սիրիա»: