ՄԱԿ-ի գլխավոր քարտուղարը զսպվածության կոչ է արել Իսրայելին
ՄԱԿ-ի գլխավոր քարտուղար Անտոնիո Գուտերեշը մտահոգություն է հայտնել Երուսաղեմում շարունակվող լարվածության վերաբերյալ, որտեղ վերջին օրերին մի քանի իսրայելցիներ և պաղեստինցիներ են զոհվել: Գրավոր հայտարարության մեջ կազմակերպության ղեկավարը կողմերին կոչ է արել խուսափել սադրանքներից՝ Իսրայելին առանձնահատուկ հորդորելով զսպվածություն դրսևորել ստեղծված իրավիճակում:
«Ես հատկապես անհանգստացած եմ բռնության բարձրացման պոտենցիալ ռիսկով և հորդորում եմ բոլոր քաղաքական, կրոնական և հասարակական առաջնորդներին զերծ մնալ սադրող գործողություներից և հայտարարություններից, ինչպես նաև Իսրայելին կոչ եմ անում զսպվածություն ցուցաբերել»,- նշել է Գուտերեշը:
Երուսաղեմում իրավիճակը կտրուկ փոխվել է հուլիսի 14-ին, երբ երեք զինված պաղեստինցիներ սպանել էին երկու իսրայելցի զինվորականների Տաճարի լեռան վրա, որտեղ գտնվում են հրեական և մուսուլմանական սրբավայրերը: Այս միջադեպից հետո Իսրայելի իշխանություններն անվտանգության ուժեղացված միջոցառումներ են ձեռնարկել տաճարի Ալ-Աքսա թաղամասում՝ մետաղական դետեկտորներ և տեսահսկման սարքեր տեղադրելով: Դրան հաջորդեցին պաղեստինցիների և իսրայելցի իրավապահների զանգվածային բախումները՝ հանգեցնելով մարդկային զոհերի:
Գրավոր հայտարարության մեջ ՄԱԿ-ի գլխավոր քարտուղարն ընդգծել է Տաճարի լեռան՝ մինչև հուլիսի 14-ը գոյություն ունեցող կարգավիճակի «լիակատար պահպանման» կարևությունը: Նա ողջունել է Իսրայելի և Երուսաղեմի մուսուլմանական սրբավայրերի պահապան համարվող Հորդանանի միջև բանակցությունները և կոչ արել ապահովել Տաճարի լեռան հավատացյալների և այցելուների անվտանգությունը: