ԱՄՆ-ի Սենատն ընդունել է հակառուսական պատժամիջոցների մասին օրենքը
ԱՄՆ-ի Սենատը հաստատել է Ռուսաստանի, Իրանի և Հյուսիսայի Կորեայի դեմ պատժամիջոցների մասին օրենքը. այս մասին տեղեկացնում է ՏԱՍՍ-ը:
Հայտնի է, որ օրինագծի ընդունմանը կողմ է քվեարկել 98, իսկ դեմ՝ ընդամենը երկու սենատոր: Այժմ հաստատման համար օրենքը կուղարկվի ԱՄՆ-ի նախագահ Դոնալդ Թրամփին, որն իրավունք ունի արգելք դնել դրա վրա:
Ընդ որում, դեռևս հայտնի չէ՝ արդյո՞ք Թրամփը պատրաստվում է ստորագրել փաստաթուղթը: Սպիտակ տան Ազգային անվտանգության խորհրդի մամլո ծառայությունում հրաժարվել են պատասխանել այդ հացին: «Ռոյթերս» գործակալության տվյալներով՝ նախագահի կողմից փաստաթղթի ստորագրումը կարող է մի քանի օր պահանջել:
Սենատի և Ներկայացուցիչների պալատի քվեարկության արդյունքները ցույց են տալիս, որ օրինագիծը մեծ աջակցության է արժանացել թե՛ դեմոկրատների և թե՛ հանրապետականների կողմից, ինչը նշանակում է, որ օրենսդիրները կարող են հաղթահարել Թրամփի հավանական վետոն:
Ավելի վաղ «Կոմերսանտ» պարբերականը, հղում կատարելով Ռուսաստանի ԱԳՆ-ի աղբյուրին, տեղեկացրել էր Թրամփի կողմից նոր փաթեթին հավանություն տալու դեպքում Մոսկվայի հավանական քայլերի մասին: Ենթադրաբար այդ քայլերից կլինի ամերիկացի դիվանագետների արտաքսումը և ԱՄՆ-ի դիվանագիտական առաքելության անդամների կրճատումը:
Պարբերականում նշվում է նաև անհամաչափ պատասխանի հավանականության մասին: Օրինակ՝ Ռուսաստանը կարող է հրաժարվել ԱՄՆ-ի հետ համագործակցությունից Վաշինգտոնի համար այնպիսի հույժ կարևոր հարցերում, ինչպիսիք են Հյուսիսային Կորեայի դեմ ճնշող միջոցների ուժեղացումը:
Այդուհանդերձ, Կրեմլում դեռ վաղ են համարել Մոսկվայի հնարավոր արձագանքի մասին խոսելը: ՌԴ նախագահի մամլո խոսնակ Դմիտրի Պեսկովն ընդգծել է, որ անհրաժեշտ է սպասել օրինագծի հաստատմանը:
Հիշեցնենք, որ հուլիսի 25-ին ԱՄՆ-ի Կոնգրեսի Ներկայացուցիչների պալատն ընդունել է Ռուսաստանի, Իրանի և Հյուսիսային Կորեայի հանդեպ նոր պատժամիջոցների սահմանումը: