Բարսելոնայում գնացքի վթարի հետևանքով տուժել է ավելի քան 50 մարդ է

Բարսելոնայի «Փարիզյան» երկաթուղային կայարանում քաղաքային գնացքի վթարի հետևանքով տուժածների թիվը հասել է 54-ի. հայտարարել է քաղաքապետ Ադա Կոլաուն:

Ավելի վաղ տեղեկացվել էր 48 վիրավորների մասին: «Տուժածների վերջնական թիվը 54-ն է, նրանց մեծ մասի վիճակը ոչ ծանր է: Դա շատ լուրջ վթար էր, և բարեբախտաբար լուրջ վնասվածքներ ունեցող միայն մեկ ուղևոր կա»,- դեպքի վայր ժամանած քաղաքապետի խոսքերը մեջբերում է La Vanguardia-ն:

Կոլաուն նաև արդյունավետ աշխատանքի համար շնորհակալություն է հայտնել հրշեջներին, ոստիկանների և բժիշկներին, որոնք «արագորեն ժամանել են դեպքի վայր և կենտրոնացրել ուժերը տուժածներին օգնություն ցույց տալու և իրավիճակը վերահսկելու համար»:

Ւնչպես նշում է Ռիա Նովոստի-ն, 19 մարդու՝ այդ թվում և գնացքի վարորդի վիճակը գնահատվում է որպես միջին ծանրության, մյուս ուղևորները թեթև մարմնական վնասվածքներ են ստացել:

Տարագոնա շրջանի Սենտ Վիսենս դե Կալդերս կայարանից դուրս եկած քաղաքային գնացքը բախվել է արգելապատնեշին: Նախնական վարկածի համաձայն՝ վարորդը չի կարողացել ժամանակին արգելակել: Սակայն Renfe երկաթուղային ընկերությունում դեռ չեն մեկնաբանել միջադեպի պատճառները՝ հայտարարելով, որ առաջնայինը մարդկանց օգնություն ցույց տալն է:

Դեպքի վայրը շրջափակված է, սակայն կայարանը շարունակում է աշխատել իր բնականոն ռեժիմով: