WikiLeaks-ը հրապարակել է Մակրոնի նախընտրական շտաբի տասնյակ հազարավոր նամակներ

WikiLeaks կայքը հրապարակել է Ֆրանսիայի նախագահ Էմանուել Մակրոնի նախընտրական շտաբի ավելի քան 21 հազար նամակներ. տեղեկացնում է Ռիա Նովոստի-ն:

Հրապարակված նամակներն ուղարկվել են 2009 թ. մարտից 2017 թ. ապրիլ ընկած ժամանակահատվածում: Կազմակերպության փոխանցմամբ՝ կայքի տրամադրության տակ ավելի շատ նյութեր կան, սակայն դեռևս մշակվել և համակարգվել են միայն այդ նամակները:

«Ընդհանուր առմամբ մենք առաջարկում ենք 78,1 հազար նամակներից կազմված արխիվ, որը ներառում է մոտ 26,5 հազար ներդիրներ հինգ հազար հասցեագրողներից»,- ասվում է հայտարարության մեջ:

Հիշեցնենք, որ մայիսի սկզբին Մակրոնը և Մարին Լը Պենը դուրս եկան նախագահական ընտրությունների երկրորդ փուլ: Դրանից մեկ օր առաջ WikiLeaks-ը տեղեկացրել էր նախագահի թեկնածուի էլեկտրոնային նամակների խոշոր արտահոսքի մասին: Մակրոնի թիմը դատապարտել էր հաքերային հարձակումները և հայտարարել, որ իրական նամակների հետ հրապարակվել են նաև կեղծ փաստաթղթեր:

Չնայած այդ սկանդալին՝ մայիսի 14-ին Մակրոնը հաղթանակ տարավ ընտրություններում՝ ստանալով ընտրողների 66,6%-ի ձայները:

Նշենք, որ WikiLeaks-ի հիմնադիր Ջուլիան Ասանժը դեռևս ձմռանն էր տեղեկացրել ֆրանսիացի քաղաքական գործչին «վարկաբեկող նամակագրության» մասին: Նրա խոսքով՝ տվյալներն ստացվել են ԱՄՆ-ի նախկին պետքարտուղար Հիլարի Քլինթոնի անձնական նամակագրությունից: Ֆրանսիական Տեղեկատվական համակարգերի անվտանգության ազգային գործակալության ղեկավար Գիյոմ Պուպարը հայտարարել է, որ հաքերային հարձակումը «զուրկ է եղել որևիցե առանձնահատկություններից և այնքան պարզ է եղել, որ գրեթե յուրաքանչյուրը կկարողանար այն իրականացնել»: