ԽՍՀՄ փլուզումից հետո ՆԱՏՕ-ի կարիքն այսօր ավելի շատ է զգացվում, քան երբևէ․ ԱՄՆ փոխնախագահ
ԽՍՀՄ փլուզումից հետո ՆԱՏՕ-ի կարիքն այսօր ավելի շատ է զգացվում, քան երբևէ։ Այսպիսի կարծիք է հնչեցրել ԱՄՆ փոխնախագահ Մայք Փենսը․ գրում է ՏԱՍՍ-ը։
«Մենք գիտենք, որ վերջին 25 տարվա ընթացքում՝ ԽՍՀՄ փլուզումից ի վեր, ՆԱՏՕ-ի կարիքն այսօր զգացվում է ավելի շատ, քան երբևէ։ Չկա Բալթյան երկրներին սպառնացող ավելի մեծ վտանգ, քան ձեր արևելյան անկանխատեսելի հարևանը (Ռուսաստանը, - խմբ․)», - այս մասին Փենսը խոսել է Էստոնիայի մայրաքաղաք Տալլինում Լատվիայի, Լիտվայի և Էստոնիայի նախագահներ Ռայմոնդս Վեյոնիսի, Դալյա Գրիբաուսկայտեի և Կերստի Կալյուլայդի հետ կայացած բանակցություններից հետո տված մամուլի ասուլիսի ընթացքում։
«Մենք հույս ունենք լավ հարաբերություններ ունենալ Ռուսաստանի հետ, սակայն Մոսկվայի կողմից նախաձեռնված վերջին դիվանագիտական քայլերը չեն սահմանափակի ԱՄՆ-ի նվիրվածությունը մեր, մեր դաշնակիցների և ողջ աշխարհում ազատություն սիրող այլ ազգերի անվտանգությանը», - ասել է Փենսը։
«Նախագահ Թրամփն ինձ ուղարկել է այստեղ ձեզ հավաստիացնելու, որ ԱՄՆ-ն կանգնած է Լատվիայի, Լիտվայի և Էստոնիայի ժողովուրդների կողքին», - ավելացրել է փոխնախագահը։
Նա նաև ողջունել է Բաթյան երկրների՝ պաշտպանական ծախսերն ավելացնելու պատաստակամությունը։ «Էստոնիան ՆԱՏՕ-ի անդամ այն հինգ պետություններից է, որոնք պաշտպանական ծախսերի համար հատկացնում են ՀՆԱ-ի ավելի քան 2%-ը։ Ուրախ եմ՝ իմանալով, որ Լատվիան և Լիտվան կհասնեն այդ ցուցանիշին արդեն 2018 թ․», - եզրափակել է Փենսը։
ԱՄՆ փոխնախագահը երկօրյա այցով Էստոնիա էր ժամանել կիրակի՝ հուլիսի 30-ին։ Փենսի հաջորդ կանգառը կլինի Վրաստանը, իսկ հետո նա կմեկնի Չեռնոգորիա։